Shillong, Jymmang, 29: Ka long kaei kaei kaba sngewsih bad kaba la pynkyndit haduh katta katta ia kiba bun ban tip ba ia ki tiar ki tar jong ki jingdonkam kiba la mang na ka bynta ka Maternity & Child Hospital kaba don hapoh ka shnong Upper New Nongstoiñ West Khasi Hills District, la rah noh sha Civil Hospital, Mawkyrwat, South West Khasi Hills District.
Ia ka MCH Hospital ha Nongstoiñ la shna pyndep kumba 3 snem eiei ha kaba bun ki paidbah nongshong shnong ki la ap khmih lynti ba ka Sorkar Jylla kan plie noh ia kane ka Hospital hadien ba ka tnad ka Koit ka Khiah jong ka Sorkar Jylla ka la mang pisa ban thied ia ki tiar ba donkam ha kane ka Hospital ha u Naiwieng, 2022.
Hynrei kaba sngewsih pat ka long ha ka 23 tarik Jymmang 2023 ar tylli ki trok ki la wan ïeng ha phyllaw jong kane ka Hospital ban kit noh ia ki tiar ki tar ai jingsumar ia kaba la lah ruh ban pyntikna ba ia kine ki tiar la rah bad pynkit noh sha ka Civil Hospital, Mawkyrwat South West Khasi Hills District
Tang shu ioh jingtip, na ka ka liang jong ka Khasi Student Union (KSU) West Khasi Hills District Unit ka la leit jurip marmar ia ka Hospital bad lap ba ka la don shisha ka jingpynkit noh ia ki tiar bad halor kane ka seng ka la dawa ia ka Sorkar Jylla ba ka dei ban wanrah thymmai noh ia ki tiar bad ban plie noh mardor ia kane ka Hospital kaba don ha Nongstoiñ.
