Shillong, Jymmang, 17: Ka Ophis u Syiem ka Hima Sohra ka la rai ban khang khyrdep noh ïa ka surok kaba pynïasoh na ka shnong Umdud shaduh Zero Point hadien ba u District Magistrate jong ka East Khasi Hills District u SC Sadhu ha ka 10 tarik mynta u bnai u la pynjari da ka hukum ban phah khang khyrdep ïa ka khyrdop khrong bai musur jong ka Hima Sohra.
Ha ka dorkhas ba ka ophis u Syiem ka Hima Sohra ka la phah sha u Superintendent ka Majai Land Custom Station, East Khasi Hills ka la pynpaw ba ka jingkhrong bai musur kaba T.200 shi kali na ka bynta ka jingpyndonkam ïa ka surok na Umdud sha Zero Point da ka Hima Sohra bad ka Dorbar ka dei kaba la aibor da ka Ingbishar Meghalaya High Court lyngba ka hukum bashipor ha ka 13 tarik Ïaiong, 2022 kaba la bthah ruh ba dei ban pynbha ïa ka surok.
“Wat ka Division Bench jong u Chief Justice Sanjib Bannerjee bad u Justice W. Diengdoh ha ka hukum ba la pynmih ha ka 2 tarik, Jylliew, 2022 ka la ïaiban ïa ki jingshisha ba ka Hima Sohrra ka la ïoh ïa ka bor ban lum ïa ka bai musur, namarkata la kyrshan da ka hukum jong ka Single Bench kaba la pynmih ha ka 13 tarik, Ïaiong, 2022 bad kam shym la tuklar satia bad ka hukum ba shipor,” ong u Syiem ka Hima Sohra ha ka dorkhas.
“Hynrei ka hukum ba la pynmih da u District Magistrate ban mana ïa ka Hima Sohra ban khrong ïa ka bai musur kumba la aibor da ka Ingbishar Meghalaya High Court, kata, da ka Single bad ka Division Bench ka long ka jingkheiñ dewthala ban pynpohdor ïa ka hukum jong ka Ingbishar bad namarkata ka rai jong ka Hima Sohra bad ka Dorbar ka long ban shu khang noh mardor ïa ka surok ïoh ka long kum ka jingpynkheiñ aiñ,” la ong shuh shuh u Syiem ka Hima Sohra.
U Syiem u la ïathuh ba ka jingpynmih hukum ban khang noh ïa ka surok ka la long ruh hapdeng ka jingïakajia ha ka shnong Majai kaba ka Hima Sohra ka la pyrshang ban sngew bad sngap ïa ki jingeh kham kloi katba lah khnang ban poi sha ka jingïasngewthuh jingmut.
“Namarkata, ban kiar na kino kino ki jingpynthud ïa ka shongsuk shongsaiñ ha ka shnong Majai la donkam ban khang noh ïa ka surok khnang ba kan pynjem ïa ka jingïakynad kaba mih na baroh ki liang,” ong shuh shuh u Syiem.
U Syiem u la ïathuh ruh ba ka Hima kan sa pan jubab na u Kontraktor ba la bynshet ban maramot ïa ka surok katkum ka jingmynjur, katba balei pat la ïoh ujor ba kam shym la don satia ka jingmaramot ïa ka surok katkum ka ujor ba la ïoh na ki nongshong shnong ka Majai.
“Ka rai ban khang khyrdep ïa ka surok kan ïai bteng tad haduh ba ka Writ Petition jong ka WPC No. 144 jong u snem 2022 kaba dang sahteng ha Ingbishar Meghalaya High Court kan da pynbeit ïa kane ka kam ha kaba ïadei bad ka jinglong jingman jong ka surok bad la ka jingkhrong bai musur ba la ai jingbit kan long na baroh ka khyrdop rung bad khyrdop mih lane da kumwei pat. Tad haduh ban da pynbeit da kumwei pat da ka Ingbishar Ingbishar Meghalaya High Court u Syiem ka Hima Sohra bad ka Dorbar kin un ym tuklar eiei,” la ïathuh shuh shuh u Syiem.
Kino kino ki briew kiba don jingwit halor kane ka hukum ba la pynmih ban khang khyrdep ïa ka surok da ka Hima Sohra bad ka dorbar ki lah ban leit ujor sha ka Ingbishar lane sha ki bor ba dei peit, la bynrap shuh shuh u Syiem.
