Shillong, Nohprah, 4: U President jong ka Khasi Author Society (KAS) u Dr. DRL Nonglait, ha ka Lah Sngi u Blei u la iathuh ba u la shim ia ka rai ban ym iakhun satia ia ka elekshon Lok Sabha.
Dang ha kine ki khyndiat taiew, ka khubor ka la mih ba u Dr. DRL Nonglait u dei uwei napdeng kiba la pynkhreh ban iakhun ia ka elekshon Lok Sabha na Shillong Seat, ka ban sa long ha u snem 2024.
“Ym dei ma nga uba pat tiket, hynrei dei ki nongialam ka UDP kiba tyrwa ia ka kyrteng jong nga,” la ong u Dr. Nonglait ha ka jingiakren bad ki lad pathai khubor.
U la iathuh ba katba u don sha Delhi na ka bynta ka jingpynlong ia ka jingiathir nia halor ka jingpynrung ia ka Ktien Khasi ha ka Khyrnit Baphra jong ka riti synshar ka ri India, u la iohi ia ka khubor ba un iakhun ia ka elekshon Lok Sabha.
“Ynda nga la wan phai na Delhi, nga la iakynduh markhmat ia ki nongialam jong ka UDP bad nga la pynpaw ba kam long satia ia nga ban iehnoh ia ka kam kaba nga dang bat mynta (kum u President ka KAS) bad namarkata ngan ym aplai satia ia ka tiket na ka UDP lane na kano kano ka party,” la ong u Dr. Nonglait.
“Ban pynkylla ia ka kam na kaba nga bat mynta ka dei ka rai kaba eh haduh katta katta. Hadien ba la iakynduh ia ki (nongialam ka UDP), ngam shym la kyntait jyndat, nga la iakren bad pynshongnia bha. Ki jingkit ki dei kiba bun syrtap bad ngam pat long ban iehnoh ia ki,” u la ong.
U la iathuh ba ka la don ka jingiakren ban pynrung ia u kum u dkhot jong ka UDP na Mawthadraishan Circle. “Ka la don ka jingïakren bad ngam pat ai ktien bad khamtam mynta leilei ngam don jingmut ban ialeh ia kano kano ka elekshon bad ka jingkylli ban rung sha ka UDP ne sha kano kano ka party kam mih,” u la bynrap.
Kum ban shu pyntip, ka UDP ka la thung ia ka State Election Committee (SEC) ban wad kyrtong na ka bynta ban pyniakhun ha ka elekshon Lok Sabha na Shillong bad na Tura Seat.
Ki seng saiñpyrthei kiba ladep pynbna ia ki kyrtong ban pyniakhun na Shillong Seat ki long ka VPP kaba la pyniakhun da u Dr. Ricky J. Syngkon, ka NPP da ka Dr. Ampareen Lyngdoh bad na ka Agatha Sangma na Tura. Katba ka Congress ka la don lypa ia u MP ba mynta jong ka Shillong Seat u Bah Vincent Pala u ban iakhun ia ka elekshon Lok Sabha ha ka wat kaba lai.
Ka BJP ruh haduh mynta kam pat ioh kyrtong satia ban pyniakhun ha kane ka elekshon na Shillong bad na Tura watla ka la pyneh beit triang ban iakhun marwei khlem da iatreilang bad kano kano ka seng saiñpyrthei.
