Shillong, Nohprah, 02: Ka Hynñiewtrep Achik National Movement (HANM) ka la aipor 10 sngi ïa ka Sorkar Meghalaya ba kan leh eiei halor ka jingkyntur pud jong ka Sorkar Assam ha ka shnong Bakhlapara, kaba hap hapoh ka Hima Nongspung, Ribhoi District.
Ka Sorkar Assam ka la shna be-aiñ ïa ka surok ha ka shnong Bakhlapara wat hapdeng ka jingpyrshah kaba jur na ki nongsynshar Hima bad ki paidbah nongshong shnong khlem da pynsngap satia wat ïa ki jingpynsngew jong ki nongsynshar ka Hima Nongspung.
“Ngin aipor 10 sngi ïa ka Sorkar Meghalaya lyngba ka Regional Committee ba kan tuklar mardor ïa kane ka kam hynrei lym kumta ka seng kan shim da ka sienjam kaba tyngeh ban leh ,eiei la ka long kaba be-aiñ ne da kino ki lynti,” la ong u General Secretary ka HAHM, Bah Kyllang Thongni ha ka jingïakren bad ki lad pathai khubor ha ka sngi saitjaiñ hadien ba la wai ka Central Executive Committee (CEC) jong ka Seng.
“U Chairman jong ka Regional Committee ka Ribhoi District u dei ban tuklar mardor da kaba phah pynsangeh ïa ka jingshna surok be-aiñ da ka Sorkar Assam ha Bakhlapara hapoh u pud u sam jong ka Jylla Meghalaya,” ula ong.
“Ngi la aipor 10 sngi, lada ka Sorkar Meghalaya kam shimkhia, ngim banse ban pyni da ki kam, la ka long da ka kam kaba be-aiñ lane da ka kam kaba long aiñ,” u la ong.
U la ïathuh ba ka seng kan sa shong jingïalang bad u Acting Syiem ka Hima Nongspung ban ïakren bad ban ïa phylliew jingmut halor ka jingïai kyntur pud jong ka Sorkar Assam sha ka jylla.
