Shillong, Jylliew, 19: Ka Sorkar Jylla ha ka sngi Balang ka la ai jingmynjur ban thung ia ka Kong Iamonlang M. Syiem kum ka Chairperson ba thymmai jong ka Meghalaya State Commission for Women (MSCW) hadien ka jingiehnohkam jong ka Chairperson barim ka Kong Phidalia Toi.
Ka la shimpor ia ka Sorkar da ki bnai ban wad briew na ka bynta ban thung ha ka shuki Chairperson.
Ka jingbym lah jong ka Sorkar ban pynbna ia ka Chairperson ba thymmai ka dei namar ka jingtreikam jong ka Model Code of Conduct (MCC) hadien ba ka Election Commission of India (ECI) ka la pynbna ia ka elekshon Lok Sabha dang shen.
Ka jingthung jong ka Sorkar ia ka Kong Iamonlang Syiem kum ka Chairperson ba thymmai jong ka Meghalaya State Commission for Women ka long hadien ba ka la shem ia kane ka longkmie kaba dei ka nonghikai ba la shongthait jong ka Deparment of Sociology ka St. Edmunds College, Shillong ka dei kaba la tbit ban ai jingshakri kum ka Chairperson barim jong ka Meghalaya State Commission for the Protection of Child Rights ia kaba la ai jingmynjur da ka Kynhun Myntri ha ka jingialang kaba la long ha ka 19 tarik u Jylliew, 2024.
