Shillong, K’lyngkot 22: Da ki hajar ngut ki paid Khasi bad kynthup ruh ia kiwei kiwei ki jaidbynriew kiba sah ha them Ribhoi ha ka 22 tarik u Kyllalyngkot, 2024 ki la mih sha surok ban pdiang sngewbha ia u nongialam jong ka seng congress u Rahul Gandhi uba la wan khnang sha Meghalaya kum shi bynta ka jingiaid kjat ne ka Jodo Nyay Yatra kaba u la sdang dang shen na ka Jylla Manipur.
Ki paidbah kiba la ieng arliang surok ki la ap ban pdiang sngewbha ia u Rahul Gandhi naduh ka shnong Jorobad ryngkat ka jingsynran lang jong u President ka Meghalaya Pradesh Congress Committee u Bah Vincent H. Pala lem bad kiwei pat ki nongialam jong ka Seng congress.
U Rahul Gandhi u la iaid da ka kjat nakhmat ka ophis u DTO, Nongpoh, bad rung sha madan NSCA Mini Stadium kaba don ha Pahamsyiem ban ai jingkren sha ki paidbah kiba la ialum da ki hajar ngut ryngkat ka jingkaweh ia ki lam jong ka seng congress.
Ia u Rahul Gandhi la synran lang da u nongialam ka All India Congress Committee u Jairam Ramesh, u General Secretary u K. C. Venugopal, u A. Chellakumar uba peit ia ka jylla Meghalaya bad kiwei kiwei ki nongialam bahakhmat jong ka party.
Haba ai jingkren sha ki paidbah, u Rahul Gandhi u la takrain tyngeh ia u Myntri Rangbahduh ka ri u Narendra Modi uba shu sngap mynthi halor ka jingia umsnam ha ka jylla Manipur.
Ia kane, u Rahul Gandhi u la kren ha ka jingialang paidbah ha madan NSCA Mini Stadium kaba don ha Pahamsyiem, Ribhoi District bad ong ruh ba ka jingthmu jong kane ka jingiaid lynti ka la long ban pyniatylli lang ia ki paidbah nongshong shnong ha ka ri ban ioh ia ka hok, halor ka jingshah leh bym hok hapoh ka jingsynshar jong ka Sorkar BJP.
U la kynthoh ruh ia ka jingbym mon jong ka Sorkar BJP ban pynrung ia ka ktien Khasi bad Garo ha ka Khyrnit Baphra jong ka riti synshar ka ri India bad kynthoh ruh ia ka jingshalan tuh ia u dewiong hapoh kane ka jylla kaba la ktah kylla pat ia ki nongshong shnong kiba im kamai jakpoh na kane ka kam.
Shwa ban pynkut, u Rahul Gandhi u la kular ia ki paidbah nongshong shnong jong ka jylla Meghalaya ba kan iakhun ia ka jingshah leh bym hok bad ia ki jingeh ba ki paidbah ki la mad hapoh ka jingsynshar ka BJP.
Shuh shuh u la ong ba un long u shipai jong ki paidbah ka jylla Meghalaya na ka bynta ban pynsngew ia ki jingeh ha Delhi.
