Shillong, K’lyngkot, 22: Ka jingthung ia ki nongtrei sorkar kiba la shong thait ha ki tnat Directorate of investigation bad Directorate of prosecution hapoh ka ophis jong ka Lokayukta kam shym la long katkum ki kyndon jong ka Lokayukta Act 2014, la ong ka Kong Angela Rngad.
Ha u kyrwoh ba la phah sha ki lad pathai khubor ha ka Lah Sngi u Blei, ka Kong Angela ka la ong, “ka section 10 (2) jong ka Lokayukta Act 2014 ka kren shai ba ka Directorate of investigation bad Directorate of Prosecution ki dei ki ar tylli ki tnat treikam kiba don la ka jong ka bor ka iktiar bad ki long kiba donkam ban thaw hapoh ka ophis jong ka Lokayukta.”
“U/ka Lokayukta ki dei ban thung ia ki Director jong kitei ki tnat napdeng ki kyrteng bad ki nongtrei Sorkar kiba la phah bad mynjur da ka Sorkar Jylla. Ka Ain ka ong ruh kumne , ba tat haduh kata ka por ba la lah ban thaw ia kine ki artylli ki tnat ne Directorate bad thung ia ki Director bad nongtrei ba pura, lah ban nang pynbiang ne thung shi por ia ki Director ne nongtrei. Hynrei kaba phylla ka long ha kano ka dur bad ha kano ka nongrim ba la thung ia kine ki Director ba shi por? Shuh shuh kumno la thung ia iwei na ka bynta lai snem, katba ia kiwei pat san snem haba ym shym don kano kano jingkdew ha ki rule? Sa kawei ka jingkylli-Kumno u Lokayukta u thung ia kine ki ophisar? Hato ka dei ka jingleh politics? Hato kine ki ophisar ki dei ki political appointee?” la buh jingkylli ka Kong Angela.
“Ka jingkhlain bad jinglaitluid jong ka ophis jong ka Lokayukta ka shong eh ha ka jingtreikam kaba khuid bad ba shlur jong u ne ka Lokayukta kiba pyndep hok ia la ki kamram katkum ba la pruid dak ha ki kyndon jong ka Ain,” ka la ong bad bynrap, “kane ka Ain Lokayukta ka mih pyrthei bad la thaw ia ka hadien ka jingiakhun kaba jwat bad jlan jong ki nongshong shnong ka Jylla. Hynrei ka pyndiaw bad pynbitar ha kajuh ka por namar mynta la pyntlot bor bad la lob ia ki bniat jong kane Ain. Kane ka Ain Lokayukta mynta ka shah ban thung tang uwei ne kawei ka Lokayukta bad nalor kata la thung beit tang da ki babu Sorkar ne ki IAS ophisar kiba la shong thait.”
“Ka jingthung tang uwei ne kawei ka Lokayukta ka long kaba mynsaw namar ka plie lad ruh ia ka jingleh mon bad jingleh donbor tang uwei ne kawei ka briew shimet. Kane kajuh ka jingpyntlot bor la leh ruh ia ka Ain RTI. Ka long kaba shai kdar ba ka jingthung ia ki ophisar ha ki tnat Directorate of investigation bad Directorate of prosecution hapoh ka ophis jong ka Lokayukta ka long be-ain. Shuh shuh uwei u briew, kum ba la thung ia u Bah J. Rymmai, um lah ban bat ar tylli ki kam, kata kum u Director of investigation bad Director of prosecution. Kane ka jingthung be-ain kan ktah ia ki jingtohkit halor ki kam bamsap kiba u Lokayukta u la mudui hakhmat ki iingbishar,” la kynthoh ka Kong Angela.
“Ka Sorkar kam khein snep ei ei bad ka iai pynkhein ia ka Ain bad thung tang uwei u briew kum u Director of investigation bad Director of prosecution kumjuh. Ngi dei ban pynrem jur ia ka jingleh be-ain jong ka Sorkar bad ngi dei ban iakhun tyngeh na ka bynta ban pynneh bad iada ia ka jinglaitluid jong ka ophis Lokayukta. Hynrei ngin ym lah ban iakhun lada ngi iai pule bakla bad batai bakla ia ka Ain. Ngi dei ban pule sani ia ka Ain bad ki kyntien kiba don ha ka Ain bad sei madan ia ki jingtip bad jingshem phang kiba shisha hakhmat u paidbah. Ki paidbah kim dei ruh ban shah ialam bakla ha ki nongiakhih kiba dawa na ka Sorkar ban pyndam ia kawei ka kam be-ain bad pyntreikam bujli da kawei pat ka jingleh be-ain,” ka la bynrap.
“Ngi dawa ba ka ophis jong ka Lokayukta ka dei ban don bun ngut ki dkhot ki ban mihkhmat na ki phang ba pher kum ki riewtip Ain, ki dkhot jong ka imlang sahlang bad kiwei. Ha kajuh ka por ban thaw bad thung ia ki Director of investigation bad Director of prosecution katkum ki kyndon jong ka Ain. Dei ban pyndam noh ia baroh ki jingthung kam be-ain ha ka ophis jong Lokayukta,” la dawa ka Kong Angela.
