Shillong, K’lyngkot 22: Ha ka sien kaba nyngkong ha ka history jong ka Meghalaya Cricket Association u samla khasi ia uba la tip kyrteng kum u Kishan Lyngdoh u la lah ban kamai 268 ron tang marwei ha ka lympung ialehkai Ranji trophy ha ka jingiakhun pyrshah ia ka Arunachal Pradesh kaba la long ha ka jylla Gujarat ha ka 5tarik u Kyllalyngkot 2024.
Ka kynhun lum khubor jong ka Batesi Tv ka la ioh ban iakren bad une u samla uba dei ruh u Captain jong ka Meghalaya Cricket Associaton ha kaba u la iathuh ba um shym la poi pyrkhat ba un lah ban kamai haduh 268 ron bad u pynpaw ruh ba ka dei ka jingngeit ka jong u ha u Blei ba u la lah ban ialehkai bha. Shuh shuh u la ong ba ka Ranji Trophy ka dei ka Highest Level BCCI Tournament Domestic ba kano kano ka kynhun kaba ki ialehkai kam dei kaba suk. U la ong ruh ba ha u snem 2021, 2022 u la sha jied ha ka IPL Auction kab a sngewsih ka long ba um shym la shah thied satia bad mynta u snem u don ka jingkyrmen ba un sa shah jied ha ka lympung ialehkai IPL da ka jinglah ban ialehkai bha ka jong u.
U President jong ka Shillong Cricket Association (SCA) Bah Peter MacDonald Kharsawian u la ong ba ka jinglah kamai ron jong u Kishan Lyngdoh haduh 268 ron tang marwei ka dei ka nam bad ka jingsngewsarong ia ka jylla Meghalaya ha kaba ym pat ju don mano mano ruh u rangialehkai uba lah ban tied haduh 200 ron shaneng.
U la pynpaw ruh ha kane ka jylla Meghalaya kiba bun na ki nongialehkai kriket ki dei kiwei pat ki jaidbynriew katba ki trai jylla pat ki duna bha haduh katta katta la ka long naduh mynshwa ne wat haduh mynta mynne namarba ki khynnah Khasi ki kham sngewtynnat ia ka jinglehkai phutbol bad kim da pynleit jingmut than ia ka jingialehkai kriket
