Shillong, Naitung 12 : Ka HYC Shella Area Unit mynta ka sngi ryngkat lang bad ki paidbah ka Shnong Shella bad ki Shnong ba Marjan bad ka jingdon lang u General Secretary HYC u Bah Roy Kupar Syrem ka la pynlong ia ka Jingialang Paidbah ha ryngkat ka rah ia ki Dongmusa hapoh Shnong Shella ban pynpaw ia ka jingpyrshah kaba jur halor ka jingthut jong ka bording elektrik ha kine ki sngi kiba lahdep tad haduh mynta ruh kumjuh. Ha kine ki taiew kiba lahdep ki nongshong shnong ki hap ban mad ia ka jingdum bad jingbym ioh bording elektrik da ki bun bun sngi bad tad haduh mynta ruh ka jingdon ka bording elektrik kam pat biang bha.
Hadien ba ka Seng ka lah phah jingthoh sha ki bor badei peit ha kine ki sngi kiba lahdep ban dawa ba dei ban weng noh ia kane ka jingeh ki paidbah mardor hynrei ki jingpynsngew bad jingdawa ki shu long leh nohei namar ym don ba pynsngap ia ki jingud. Kane kam dei ka sien ba nyngkong hynrei lah jan man u snem tang shu poi ka por slap ki nongshong shnong ki hap ban shong ha ka jingdum da ki sngi bad ki taiew. Watla ia kine ki jingeh lah pynsngew ha ki bor ba halor ban thawlad thawlynti lah jan ma u snem hynrei I kumba ki bor ba dei peit kim khein snep satia.
Kumta, ka Seng ha ryngkat ki paidbah kam banse ban pynlong Ia kane ka prokram ia khih lyngba ka Jingialang Paidbah ha ryngkat ki dongmusa bad kumjuh ruh ban thang ia ki tyngshop jong ka MePDCL bad jong ka Sorkar MDA-II.
Ha kane ka sngi lahdon ki Nongialam ka Seng na ka Unit ha ryngkat ki Nongialam na ka Sengkmie ba kynthup ia u Samla Rangbah Roy Kupar Synrem, General Secretary bad kiwei kiwei. La ia don ryngkat ruh ki Nongialam bad ki Riew Rangbah ka Shnong Shella bad khamtam eh ki paidbah jong ka Shnong Shella bad ki Shnong ba Marjan.
Shuwa ban thang tyngshop lah don ka Jingialang kaba lyngkot ha kaba lah ioh ki jingkren na u Headman ka Shnong Shella Bah Readerforce Sarubai uba lah kyntu ia ka Seng ban shimkhia lem ban pynsngew ia ka jingeh ki nongshong shnong sha ki bor ba halor bad u lah pyntip ruh ba na ka liang jong u, u long ba lah kloi ban iatreilang bad ka Seng halor kane ka m
U Bah Roy Kupar Syrem, GS HYC u lah pynpaw ba I kumba ka MeECL bad ka Sorkar Meghalaya ki kwah ba ki nongshong shnong ka dong ka thain kin leit phai biang sha ka juk jong ka Jingdum haba ka pyrthei baroh kawei ka beh sha ka Jingshai. Kane ka jingeh ki nongshong shnong kam dei kaba thymmai hynrei na ka por Sha ka por lah ju pynsgew ha ki bor ba dei peit hynrei ym shim lah iohi ia ka jingkylla na kane ka jingeh. U lah pynpaw ba ka Seng kan nym shongthait hynrei kan buddien bad iai pynsgew ia kane ka jingeh ki nongshong shnong bad lada ki bor ba halor kim sngap ka Seng kan sa shim da kiwei pat ki sienjam ba kham tyngeh.
