Shillong, Rymphang, 19: U National President jong ka National People’s Party (NPP) uba dei ruh u Myntri Rangbah jong ka jylla Meghalaya u Conrad K Sangma ryngkat bad u State President u Bah Prestone Tynsong ha ka Lah Sngi u Blei ki la pdiang burom ia ki ar ngut ki MDC ka Congress sha ka seng NPP bad ia u MDC barim jong ka Sohra u Bah Donevan K. Wanlang.
Ki arngut ki MDC ki kynthup ia u MDC jong ka Congress na Mawkyrwat u Bah Carnes Sohshang bad uwei pat u dei u MDC ka Congress na Mairang u Bah Batskhem Ryntathiang,
Da ka jingpyniasoh jong kine ki arngut ki MDC ka Congress ka NPP kaba ialam ia ka Executive Committee ka la nang kiew ha ka jingbunpaid ha Khasi Hills Autonomous District Council (KHADC).
Ka jingpynïasoh jong kine ki lai ngut sha ka NPP ka long ruh kum shi bynta ban pynkhlaiñ shuh shuh ïa ka NPP na bynta ka elekshon Lok Sabha ka ban sa long shen ha kine ki khyndiat bnai bad kumjuh ruh na bynta ka elekshon MDC kaba la khmih lynti ba kan long la kumno kumno ha ki bnai bakhatduh jong une u snem.
Ha kane ka sngi la sakhi lang da ki MLA jong ka NPP ba kynthup lang ruh ia ki MDC ka KHADC kiba dei ruh na ka party NPP.
