Mairang, Rymphang, 19: Kum shibynta ban pynpaw pyrthei ia ka jingitynnad jong ka jaka jngohkai pyrthei ia kaba la tip kyrteng kum ka “Dom Marwein” kaba don ha ki thain pariong Eastern West Khasi Hill District bad kum shibynta ban kyntiew iaka sap ka phong jong ki khun Samla ka dong ka thain ka “Western Khasi Hala Ki Sap Ban Sei” haka 17 tarik u Rymphang 2024 kala pynlong iaka ka W.E.S Festival ha katei ka jaka kaba itynnad ha kaba u bah Robert June Kharjahrin uba dei u kyrtong MP ka RDA na Shillong Parliamentary Seat ula wan ban long kum u kongsan.
U bah Kharjahrin haba ai jingkren kum u kongsan ula pynpaw iaka jingiaroh iaka jingiohijngai ka ‘Western Khasi Hala Ki Sap Ban Sei’ ban pynlong ia kane ka festival kaba lada nang ban tyngkai bad pynwandur iaka jingitynnad jong kane ka jaka kan long kum ka pliang ja ka ban iarap ia shibun bah ki longing longsem ha kaban kyntiew iaka ioh ka kot ha ki liang baroh. U ong ruh ba ka jingiohi jngai ka organization ban plie lad plie lynti bad ban ai iaka rynsan iaki khun samla ba kin pynpaw iaka sap kaba ki don bad ban kyntiew iaka sap ka phong ka jongki ka long shisha kaba don kam ha kane ka juk kaba mynta kaba lada ki khun samla ki trei shitom bad ki pyndonkam hok iaka sap kaba ki don ym tang ba ki lah ban bsa iaka ing ka sem hynrei kin rah ruh iaka burom bad ka nam jong ka jaitbynriew.
U la ong lada un jop iaka election MP u kular ban ia don ryngkat bad ki paidbah bad ban ai mynsiem iaki da kaba ai iaka kti ka mon ka kti ka diang ban pynkiew iaka kam jongkai pyrthei haki thain nongkyndong bad ban kyntiew iaka sap ka phong kaba ki khun samla ki don kaba dei ruh kawei naki lad ban rat diengkhong iaka jingduk tasam haka ri bad ka jiatbynriew.
U la ban ruh da kaba ong, ba ka por kaba ngi im mynta ka dei ka por ba ngin ia ai kti ym shuh ka por ba ngin ia kdew kti, ka por ba ngin iakren iaki kam daka jingkitklieh ym da ka jingshitkhlieh. U la ong ruh baka dei kaba por ba ngin pyrkhat sani kumno ban pynbha iaka ri bad ka jaitbynriew bad kam dei shuh ka por ban ia pynibor mano ba kham tbit ban iaka wang ktieh bad ka dei ka por ba ngin hap ban ia tylli para mangi ban kyrshan lang ia kiei kiei kiba bha.
U la ong ba ka jaitbynriew haki por mynshwa haba ki briew ki kham ioh kham kot ki kynnoh iaki ba ki dei ki nongri tlen bad mynta pat haba ki briew ki kham ioh kham kot ki kynnoh iaki ba ki dei nong bamsap, ula ong ka por kala dei ba ngin hap ban ai mynisem iaki para briew haba ki trei shitom bad leh iaka babha bad lada ngim ai mynsiem mano pat ban kitkhieh iaka ri bad ka jaitbynriew. U la ong ruh lada kum ka jaitbynriew ka kwah ban kyntiew iaka sap ka phong, ban kyntiew iaka roi ka par bad ka jingiada kaba pura iaka ri bad ka jaitbynriew ka por kala dei ban iawan lang ban ia tylli kawei bad ban ia ai iaka kti ka diang ka kti ka mon bad ban ia trei shitrhem daka jingkitklieh naka bynta ban iada iaka ri bad ka jaitbynriew.
