Shillong, Rymphang, 19: Tang shu wan poi ka met, ki bahaing hasem ki la leh burom khatduh ia ka met ba dang sah jong u Amit Sinha u Pulit Sub Inspector uba la duhei ia la ka jong ka jingim ha ka jingaksiden kali kaba la jia ha ka shnong Gurgaon, Haryana ha ka 17 tarik mynta u bnai.
U Amit Sinha u la ngat ha kane ka jingjia basngewsih katba u dang leit donkam sha Delhi na ka bynta ki kam ophis ba la bynshet da ka tnad Pulit ka jylla.
Hadien ba ka met jong u ka la wan poi ha ka step sngi u Blei, ki bahaing hasem bad ki lok ki jor ki la leh burom khatduh ïa ka met ba dangsah ha ka shnong Dakhingoan, Kahilipara, Guwhati bad hadien ba la pyndep ia ka jinglehniam la rah ban leit onthang ïa ka met sha ka jaka lehniam thang metiap briew kaba don ha Kamakya, Assam.
Ha kane ka jingleh burom ïa ka met, la donlang da u Deputy Commissioner jong ka Ribhoi District u Arpit Upadhaya, u Superintendent of Police u Jagpal Singh Dhanao, u SP barim ka Ri Bhoi u Giri Prasadbad kynthup ruh kiwei kiwei ki heh ophisar pulit kiba la sakhi ia ka jingleh burom Salami da ka tnat Pulit Ribhoi.
