Mawkyrwat, Rymphang 13: Ka long ka jingduhnong kaba khraw ïa ka Indian National Congress (INC) ha South West Khasi Hills District bad ha Mawkyrwat Block Congress Committee hadien ka jingmih noh ki nongkitkam bad ki nongtrei jong ka party ha ka 2 tarik mynta u bnai bad ban leit pynïasoh sha ka National Peoples Party (NPP).
U President ka District Congress Committee (DCC) Bah K.K Nongsiej, u la ïathuh ba u la iehnoh ïa ka jinglong kum u nongkitkam jong ka Congress party na ki daw shimet.
Ha kajuh ka por u nongthoh khubor u la sakhi ïa ka shithi iehnoh kam jong u Babu Valentine Thyrniang kum u President jong ka Mawkyrwat Block Congress Committee bad la sngewthuh ba hadien ka jingiehnoh kam na ka Block, u Babu Valentine Thyrniang u la pynshai paitbah ba un ym treh shuh ban long nongïalam hapoh ka seng Congress.
Nalor kine ki ar ngut ki nongïalam rangbah jong ka Party, la sakhi ïa ka jingiehnoh kam jong ka Dr. B. Marweiñ kum ka President jong ka Mahila (Women’s Wing) hapoh ka Mawkyrwat Block kumjuh ruh ïa ka jingiehnoh kam u Bah Valdo Lyngdoh kum u District Youth President.
Shuh shuh katkum ka jingïohlum jingtip ba ha ka juh ka sngi nalor kitei ki nongïalam, la ong ruh ba bun ki nongtrei jong ka Congress kiba don hapoh ka South West Khasi Hills District bad ka Mawkyrwat Bock ki la iehnoh kam halor ki daw shimet shimet jong ki.
