Shillong, Lber, 31: U Superintendent of Police ka East Khasi Hills District u Rituraj Ravi u la maham tyngeh ia ki paidbah ba kim dei ban pynsaphriang ia ki khubor lamler kiba iadei bad ka jingjia ha ka 27 tarik mynta u bnai ha ka shnong Ichamati.
“Ka la poi ka jingtip sha ngi ba ki don katto katne ki khubor thok bad ki khubor lamler kiba la pynsaphriang ha ka Social Media ha kaba iadei bad ka jingjia ha ka 27.03.2024 ha ka shnong Ichamati. Kum kine ki khubor lamler ki buh jingma, bad pynthud ia ka shongsuk shongsain,” ong u SP ha u kyrwoh ba la phah sha ki lad pathai khubor.
Ha kaba iadei bad kane, la kyrpad ban ym pynphriang ia kum kine ki jingjia khlem da wad ia ki jingpynshisha. Ngi kyntu ia ki paidbah ba kin ym pynsaphriang ne iasam kum ia kine ki jait khubor khlem da wad shwa ia ki jingshisha. Ngi kyrpad ruh ia ki paidbah ban ai ka jingiatreilang ban tem ia ka jingpynphriang ia ki khubor thok ha ka Social Media, la ong shuh shuh u SP
