Shillong, Rymphang, 01: Kum shibynta ban tehlakam ia ka jingioh kamai laitluid ki bar jylla kiba shong basah hapoh ka jylla Meghalaya bad kumjuh kiba bylla ñiah kali Tourist na Shillong sha Guwahati kiba pyndonkam da ki kali ba don ia u number ML, ha ka sngi Palei ka Hynñiewtrep Integrated Territorial Organisation (HITO) Shillong City ka la pynlong ia ka jingkhynra ia ki Trading Licence bad Labour Licence ha Inter State Buss Terminal (ISBT) Mawiongrim da ka jingsynran lang jong ki Pulit ka Mawlai Police Station bad ki Enforcement ka Khasi Hills Autonomous District Council (KHADC).
Ha ka jingiakren bad ki lad pathai khubor, u President ka HITO Shillong City samla Banpyntngenlang Syiemlieh u la ong ba ka jingtalasi ia ki kot ki sla jong ki bar jylla ka dei namarba bunsien ki briew kiba nabar da kaba suk ki kamai jakpoh hapoh ka jylla, katba ki trai ri trai muluk pat ki mad jingeh ha kamai kajih namar ki shah knieh lut ha ki bar jylla.
Ha kane kajuh ka sngi, katba ki dkhot ka seng ki dang wan phai ha ISBT, ki la ioh bat ia kumba 18 ngut ki bar jylla kiba wan na ka jylla Assam kiba thmu ban trei bylla sngi sha kane ka jylla Meghalaya.
Ia kine ki bar jylla, ka seng ka la ioh bat katba ki dang iaid lynti na surok VIP Road ha ka shnong Mawkynroh-Umshing.
U samla Banpyntngenlang Syiemlieh u la iathuh ba kine ki bar jylla ki la wan da ki lai tylli ki kali Private kiba don ia u nombar AS21 M-1397, AS01BA-7400 bad AS02 V-7565 bad iathuh ruh ba kine ki bar jylla kim don satia wat tang ia ka Labour License, ka EPIC Card ne kino kino ki kot ban pynshisha hynrei lait noh tang uwei bad arngut kiba la pyni ia ki Aadhaar Card.
U la iathuh ruh ba ki nongñiah jong ki kali ki len beit ba kim don jingtip shaei yn leit buh ia kine ki bar jylla bad kam ruh ba ka dang dei ka sien kaba nyngkong eh ba kin wan rung sha nongbah Shillong.
“Kaba kham pynlyngngoh ia ngi ka long kine ki bar jylla kim tip shaei kin leit bad kim tip hi ruh mano ba phah bad ngim da sngewthuh sngewthaw ia ka jingkren ka jong ki,” u la ong.
Nalorkata, u samla Banpyntngenlang u la iathuh ba wat ki briew kiba donkti ban wanrah ia kine ki bar jylla sha Meghalaya kim shym la wan mih satia ban iakynduh ia ki dkhot jong ka seng wat haba ki la ap haduh jin ar kynta eiei.
Hadien kane, ki Pulit ka Mawlai Police Station ki la wan poi ha kane ka jaka ban pynlong ia ka jingtohkit kaba bniah.
“Ngi dawa ia ki Pulit kiba ap pahara ha Infiltration Chech Gate ha Byrnihat ba kin peitngor bad kin pyrkhing ia ka rung ka mih jong ki briew kiba nabar shapoh ka Jylla Meghalaya,”u la ong.
