Shillong, Rymphang, 01: Ka tnatSports and Youth Affairs jong ka Sorkar Jylla ha ka sngi Palei ka la pdiang burom ia ka kynhun ialehkai phutbol na kane ka jylla kiba la wanrah ia ka nam ka burom hadien ba ki la ioh rah ia ka nam lahduh ha ka lympung ialehkai phubol Under 18-Boys da kaba pynliem noh da 2 kol la nod pyrshah ia ka Punjab ha ka Khelo India Youth Games 2023 kaba la long ha Chennai.
Ia ka kynhun ki nongialehkai ba la kit ha ka kali kaba la pynkhreh lypa la pdiang burom na ka shlem treikam jong ka Banalari World Cars bad iaid lyngba ka surok Petrol Pump, ter ter sha Mawlai Iew Rynghep bad rung sha surok Seng Khasi College bad kiew pat sha Jaiaw Mawbynna ter ter sha Jaiaw Pdeng, Mawkhar, Motphran, Police Bazar, DC Office, Raj Bhawan, IGP, Additional Secretariat, Main Secretariat bad wan phai biang sha DC Office bad iaid lyngba ka Wards Lake bad hiar sha iew Polo bad pynkut pat ia ka jingiaid lynti ha madan ialehkai phutbol ka MFA ha Polo.
Ha ka jingpdiang burom ia kine ki rangialehkai phutbo ka jylla la synran lang da ka Director jong ka tnat Sports and Youth Affairs ka Kong Isawanda Laloo, u President ka MFA u Bah Hamletson Dohling, u Working President ka Meghalaya Sports Olympic Association Bah John Kharshiing, u General Secretary u Bah Finely Pariat bad kiwei kiwei.
Hadien kane, kane ka kynhun ka la shah pynkup burom ha u Myntri ka tnat Sports and Youth Affairs ka Sorkar Jylla ha Secretariat.
