Shillong, Jymmang 03: U Myntri ka tnat Bording ka Sorkar Jylla u Abu Taher Mondal u la leit jurip ïa ka Myntdu Leshka Hydro Project ka jaka pynmih bording kaba don ha West Jaiñtia Hills District ha kaba la synran lang da u u Director ka Meghalaya Power Generation Corporation Ltd (MePGCL) Bah R. Majaw bad ki heh jong ka MePGDCL.
Ka jingleit jngoh ïa ka jaka pynmih bording ka long ban sngewthuh katno ka pynmih bording mynta na kane ka jaka bad ban peit ïa ka jingdonkam bad ka jingïakren ba kumno ban pynbha ïa kane ka bynta kaba nyngkong bad ïa ka jingtrei yn sa pyndep ha ka 15 tarik u Jylliew 2024.
Ha kane ka jingïalang kaba la long ha ka sngi Thohdieng la shem ba ka don kawei ka jingeh hapoh ka jaka pynmih bording Power House ba kam don ïa ka signal ban kren mobile, dei na kane ka daw ba la ai jingmut ban thied ïa ki kor phah jingtip VHF Sets hapdeng ka jaka pynmih bording bad ka jaka pynlang um ka dam.
Ha kane ka sngi u Myntri kam bording u la leit ban jngoh ruh ïa ka dam bad ban peit ïa ka jingtrei ban pynbha ïa ka bad u la ban jur ba dei ban da trei sani ïa ka kam bad ïa kane ka jingtrei la pyntrei da ka M/S. Multi Tech Engineers.
Kane ka jingleit jngoh jong u Myntri ka long ban pynthikna ïa ka rukom pynmih bording kaba biang na ka Leshka Project.
