Shillong, Nailur, 17: Ka North East Indigenous People’s Forum (NEIPF) Meghalaya Chapter ka la kyntu ïa ka Sorkar Jylla ban pyntreikam da ki kyndon aiñ kiba pyrkhing kynthup ruh ban thaw noh da ka Anti-Narcotics Battalion ban ïakhun pyrshah ïa ka jingjyllei jong u drok ha ka jylla.
Ha ka dorkhas ba la phah sha u Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong ha ka sngi Balang, u Chairman jong ka NEIPF uba long ruh u President barim ka FKJGP Bah Wellbirth Rani bad u Bah Sadon Blah uba long u Secretary jong ka Forum bad President ka HNYF ki la ong, “ka jingjyllei jong u drok bad ki kam runar ruser ki dei ki mat kiba sngewkhia bha haduh katta katta kiba buh jingma ïa ka jingshngaiñ jong ki nongshong shnong jong ngi. Ka ladei ka por ban leh da kaba tyngeh da kaba pyntreikam ïa ki kyndon aiñ kiba kham pyrkhing shwa ban dier ka por.”
“Ha kine ki snem, ngi la sakhi kumno ki ri kum ka Philippines ka la mad jingeh namar ka jingjyllei jong u drok. Ki bor synshar ha Philippines ki la hap ban pynjur ïa ka jingïakhih pyrshah ïa u drok ne ka thma jong ka Philippines pyrshah ïa u drok ha ka por ka jingsynshar jong u President barim ka Philippines, u Rodrigo Duterte uba la kynnoh ba u la donkti ha ka jingpynïap briew khlemakor. Mynta ka jingkylli kaba mih ka long, hato ngin ailad ïa kum kine ki jingjia ha Meghalaya ba kin laitlan kum ha ka ri Philippines kaba pyntreikam syndon da ka hukum ban shu siat ïap beit tang ban pynduna ïa ka jingjyllei jong u drok beaiñ?
“Hooid ym dei, bad kum kane ka jingjia ngim kwah ba kan wan jia. Ngim lah ban ailad ba ki jingpynïap briew kin jia ha ka jylla jong ngi kumba ka la jia ha ki sngi badum jong ki lehnoh ha kaba la pynshitom bein bad pynïap klep khlem jingsngewsynei ïa ki nongai jingtip ba la shu suba. Ka jingim jong uwei pa uwei u nongshong shnong bad ki samla jong ngi ka long kaba kordor. Ki samla ki dei ka lawei jong ka jylla, ngi dei ban buh ïa ka jingpyrshang kaba ïatylli ban pynjngai ïa ki na ki jingshah teh ha ki jingmlien kiba sniew,” la pynpaw ki nongïalam jong ka Forum.
Ha ka dorkhast ka Forum ka la ai ruh katto katne ki jingmut ban leh eiei noh mardor da ka Srkar.
Ka NEIPF ka la kyntu ïa ka Sorkar ba la dei ban kham pynkhlaiñ ïa ka tnat syntiat ban ïohkem ïa ki nongkhaii drok nabar jylla bad ban pynkdiah ruh ïa u budlum ka jingkhaii ïa u drok.
Ka la dawa ruh ba dei ban thaw da ka Anti-Narcotics Battalion hapoh ka tnat Pulit ka jylla Meghalaya ka ban peit beit thik tang ha ka jingïakhun thma pyrshah ïa u drok.
“Ngi sngewnguh ba ka sorkar Meghalaya ka la thaw ïa ka Anti-narcotics Task Force (ANTF) ban ïakhun pyrshah ïa u drok. Hynrei la sngew donkam shuh shuh ba ki Pulit Meghalaya ki dei ban thaw ïa ka Anti-Narcotics Battalion ka ban peit beit thik kumno ban ïaleh pyrshah ïa u drok naduh ka jingkem ïa ki nongkhaii drok, ka jingpynkdiah ka jingshalan beaiñ ïa u drok bad wat ïa ki nongdie khutia bad ïa ki Kingpin. Ïa mynta ka tnat Pulit jong ka Jylla Meghalaya Police ka la hap ban leh lut baroh ki kam naduh kaba peit ïa ka shongsuk shongsaiñ, ban kem ïa ki nongpynkhein aiñ bad ki nongleh kam bymman nalor kiwei kiwei ki kam,” la pynpaw ka Forum.
Shuh shuh ka NEIPF ka la ïaiban ba la donkam ban ailad ïa ki Dorbar Shnong ba kin thaw da ki Komiti ba peitngor ban kem ïa ki nongdih drok kiba leh ïa ki kam runar ruser bad ban pyntip sha ki bor ka aiñ lada lap ïa kino kino kiba ishan khmat.
Ka la ai jingmut ruh ban kham pynbun ïa ki Rehabilitation Centre bad ban ai ïa ki jinghikai seng kam na ka bynta ki briew kiba la koit na ka jingkyrni dih drokban ïarap ïa ki ban wanphai biang bad ka imlang sahlang nalor ban weng ïa ka jingshah kynnoh kaba ïadei bad ka jingdih drok bad ban pynshlur ïa ki longiing ban wad jingïarap na ka bynta ka jingsumar.
“Ka long kaba donkam ban tip ba ka Meghalaya kam pat don ïa ki Rehabilitation Centre kiba biang ha kylleng ka jylla, watla ka la shah ktah ha ka jingjyllei jong u drok ha kiba bun ki longïing ha ki district bapher bapher jong ka jylla. Kumta dei ban buh kham bun ki Rehab Centre katkum ka jingdonkam ban ai ka jingsumar kaba paka, ka jingai jingmut bad ka jingpynïasoh biang ha ka imlang sahlang,” la ong ka Forum.
