Shillong, Risaw 17: Ka jingjyllei jong ki bar jylla kiba khaïi bad kiba trei be-aiñ ha kylleng ki district kiba dang hap hapoh u pud treikam jong ka Khasi Hills Autonomous District Council (KHADC) ka la pynlong ia ka Meghalaya Peoples Labour Union (MPLU) ban leit ujor ui Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ha ka sngi Baar.
Katkum ka jingujor jong ka Union, ka jingseng kam beain bad ka jingioh trei laitluid jong ki bar jylla ki long kum ha Byrnihat, ha EPIP, ha 13 Mile bad ha baroh kawei ka Raid Marwet kaba hap ha Ribhoi District, ha ka shnong Shallang ha kaba ha ki karkhana sain rnga dewiong la tyllep da ki bar jylla ki bym don ia ki kot ki sla kiba biang, ha Ichamati, ha Kalibari, ha Majai bad ha baroh ki shnong khappud jong ka South West Khasi Hills district, ha Borsora, ha Cherragoan bad ha Bagli, kiba hap hapoh ka West Khasi Hills.
Ha kaba iadei bad kane, ka Union hapoh ka jingialam jong u General Secretary u Bah B. Basaiawmoit ka la aiti da ka jingthoh ha u Bah Pyniaid Sing Syiem ban kyrpad ia ka District Council ban khynra naphang ia kine ki jaka ba ki bar jylla ki trei laitluid khlem ki kot ki sla kiba biang bad pynpaw ruh ba ka Union ka long kaba kloi ban ai ka jingiatreilang bad ka Council ha kaba iadei bad kane ka bynta.
