U Pope Francis, ha ka sngi saitjain ka 8 tarik Naitung, 2023 u la thung ia u Fr. Ferdinand Dkhar uba la 59 snem ka rta, uba bat mynta kum u Administrator jong ka Jyllaniam Jowai, Meghalaya, kum u Bishop ba thymmai jong ka Jowai.
Ia kane, la pynbna da u Archbishop jong ka Jylla Niam Bah Shillong u Most Rev. Victor Lyngdoh ha u kyrwoh ba la phah sha ki riewniam, bad sha ki paidriewngeit jong ka Balang Catholic da kaba pyntip ba u Apostolic Nuncio sha India u Most Rev. Leopoldo Gerelli u la pyntip ba u Pope Francis u la thung ia u Reverend Father Ferdinand Dkhar kum u Bishop ba thymmai jong ka Jylla Niam Jowai ha ka 8 tarik Naitung, 2023 ha ka por 3:30 baje nohphai sngi.
Kum ban shu pyntip hangne, ia u Fr. Ferdinand Dkhar la kha ha ka shnong Ïongkaluh, Jowai, ha ka 26 tarik, Rymphang, 1962. Hadien ba u la pyndep ia ka jingpule ha Minor Seminary, Upper Shillong, u la bteng ia ka jingpule ia ka Philosophy ha Christ King College bad ia ka Theology ha Oriens Theological College, kiba hap hapoh ka jylli jong ka Jylla Niam Bah Shillong.
La pynkyntang Lyngdoh Sohblei ia u Fr. Ferdinand Dkhar ha ka 23 tarik, 1994 ha Jowai. U la shakri kum Dean of Studies ha Minor Seminary Upper Shillong ha u snem 1994 bad 1995 bad hadien kane u la shah thung kum u Assistant Parish Priest jong ka Annunciation Church, Namdong naduh u snem 1995 haduh u snem 2000. Nangta, u la trei ruh kum u Assistant Parish Priest naduh u snem 2000 haduh u snem 2002 bad kum u Parish Priest naduh u snem 2002 haduh u snem 2007 ha ka Parish Church of the Holy Spirit, Ummulong. Ka jingshakri jong u kum u nongsharai mynsiem ka la bteng hadien ba u la shah thung pat kum u Parish Priest jong ka Annunciation Church bad kum u Principal jong ka High School ha Namdong naduh u snem 2007 haduh u snem 2009. Hadien kane, la thung ia u kum u Procurator jong ka Jyllaniam Jowai naduh u snem 2009 haduh u snem 2021 bad naduh u snem 2021 haduh mynta u la bat ia ka kyrdan kum u Diocesan Administrator jong ka Jyllaniam Jowai.
Ka khet jong ka Jyllaniam Jowai ka la sah thylli hadien ba u Bishop Victor Lyngdoh u la shah jied ban shimti noh kum u Archbishop ba thymmai jong ka Jylla Niam Bah Shillong ha ka 28 tarik, Nohprah, 2020. U Fr. Ferdinand Dkhar u dei u Bishop balai jong ka Jylla Niam Jowai bad hashwa kata ia kane ka Jylla Niam Jowai la sharai da u Bishop Vincent Kympat naduh u snem 2006 tad haduh ka jingkhladnoh ha u snem 2011 bad hadien kata, la shimti pat sa u Bishop Victor Lyngdoh naduh u snem 2011 haduh u snem 2020.
Ia ka Jylla Niam Jowai la pynkha ha u snem 2006 hadien ba la phiah na ka Jylla Niam Bah Shillong bad ka don 1,20,275 ngut ki riewngeit Catholic, 23 tylli ki Parish, 30 ngut ki Lyngdoh Niam, 41 ki riewniam, 83 ngut ki riewniam Sister bad 313 tylli ki shlem ai jinghikai ha ka pule puthi.
![](https://batesitv.com/wp-content/uploads/2023/07/Adobe-Scan-Jul-08-2023-1_1-762x1024.jpg)