Shillong, Jylliew, 10: Ka Hima Sutnga Youth Federation (HSYF)O ka la dawa ia ka Sorkar Jylla ba kan pynmih da ka hukum kaba bthah ia ka Cosmos Cement Limited ban sangeh noh mardor ka jingpynjot bad ka jingpynjulor ia ki khlaw ki btap kiba don hapoh ka jylli jong ka Elaka Sutnga ha East Jaintia Hills District.
U President ka Federation u Bah Nangbha Nongtdu ha ka jingiakren bad ki lad pathai khubor ha Shillong Press Club ha ka Lah Sngi u Blei u la iathuh ba ka jingheh jong ka khlaw kam duna ia ka 2-3 kilometer kaba la tip kum ka Bthar, kaba hap ha ka shnong Umthe, Umkboh, Tongspo bad Umshngain.
“Kum ki paidbah ngim kwah ban shim ia ka ain ha ka kti namarkata kum u President ka HSYF nga kyrpad ia ka Sorkar Jylla bad ia ki bor ba dei khmih ba kin khang noh ia ka Cosmos Cement Ltd,” la ong u Bah Nangbha.
U la kynnoh ba kane ka Kompeni ka la pom ia ki dieng, ka la dih tih khyndew, tih ia ki maw ki shyiap bad khlong ruh ia u mawshun na ka khlaw hapoh ka Elaka Sutnga. U la kynnoh ruh ba ia ka Cosmos Cement Limited la ai jingbit da u Acting Doloi ban pyntrei ha kane ka khlaw kaba hap hapoh ka jingpeit jingkhmih jong ka Elaka Sutnga.
Shuh shuh u la ong ba ka Dorbar jong ka Elaka Sutnga kaba ladep lum ka la shim ia ka rai ban ym shah shuh ban tih ia ki marpoh khyndew hynrei kumba ka long mynta kane ka kompeni ka dang bteng ban pynjot ia ki khlaw ki btap hapoh kane ka khlaw.
