Shillong, Jylliew, 21: Ka State Election Committee (SEC) jong ka Voice of the People Party (VPP) ha ka 21 tarik u Jylliew, 2023 ka la pynbna paidbah ban pynieng ia u Dr. Ricky AJ Syngkon kum u Kyrtong MP ha ka elekshon sha ka Ingdorbar Thawain Lok Sabha na 1-Shillong Parliamentary Constituency ka ban long ha u snem 2024.
Ia kane la pynbna da u General Secretary jong ka VPP u Dr. Cara Chen ha ka jingialang bad ki lad pathai khubor kaba la long ha Conference Hall jong ka MLA Hostel, Shillong.
U Dr. Chen u la iathuh ba ka State Election Committee jong ka VPP kaba la long ha ka 16 tarik mynta u bnai hadien ka jingiathir iatai sani bha ka la mynjur ia ka kyrteng jong u Dr. Ricky A.J
“Kum ka seng sainpyrthei, hadien ba ngi la rung sha ka jylli iakhun, la ngi jop ne ngi rem kam da shong eh ha ka jingdon jong ki MLA hynrei ka shong ha ki paidbah ban ai ia ka rai,” la bynrap u Dr. Chen.
Haba kylli, Dr. Chen u la ong ba ka VPP kan iaid beit la ka jong ka lynti bad kan ym iatreilang bad kano kano ka seng sainpyrthei namarba ka party ka kwah ban shahniah beit ha ka jingkyrshan jong ki paidbah.
U la iathuh ba ka VPP ka la ioh pdiang bun tylli ki aplikeshon bad don ruh kiba la leit iakynduh markhmat dalade hi ia u President ka paty u Bah Ardent Miller Basaiawmoit ban pynpaw ka jingangnud jong ki ban iakhun ia ka elekshon MP na ka tiket jong ka VPP. Shuh shuh u la pyntip ba kiba la aplai tiket ki don arngut kiba kynthup ia ka Dr. Bahunlang L. Tron kaba long ka Assistant Professor jong ka PGT College, Shillong bad uwei pat u dei u Prof. Lakhon Kma uba hikai ha NEHU, Shillong.
