Shillong, Jylliew, 21: U MDC jong ka Indian National Congress na Mawhati Constituency ha ka Sngi Balang u la shah jied kum u Deputy Chairman ba thymmai jong ka Ïingdorbar Thawaiñ ka Khasi Hills Autonomous District Council.
Kane ka jingshimti jong u Bah Marngar ia kane ka shuki, ka long hadien ba u MDC ka NPP na Mawsynram Constituency u Bah Alvin Sawkmie u la hiar shuki shwa ban shimti kum u Executive Member ha ka Executive Committee la ialam da u Bah Pyniaid Sing Syiem kum u Chief Executive Member (CEM).
U Bah Charles Marngar u la jop suk ia kane ka shuki khlem kano kano ka jingialeh pyrshah.
Ha ka sngi Baar, u Bah Pyniaid Sing Syiem uba la shah jied kum u Chief Executive Member u la phah ia ka thup kyrteng jong ki 9 ngut ki Executive Members sha u Lat ka Jylla Meghalaya u Phagu Chauhan ban ai jingmynjur.
Kane ka thup kyrteng jong ki Executive Member ka kynthup ia u Bah Pynshngaiñ N. Syiem uba long u CEM barim bad u MDC jong ka Congress u ban shimti kum u Deputy CEM bad u MDC ka Congress Mawkyrwat Constituency u Bah Carness Sohshang. Katba ki shuki EM kiba sah la bhah sha ki MDC jong ka NPP.
Napdeng kine ki khyndai ngut, hynriew ngut ki Executive Member ki dei kiba la don teng hapoh ka Executive Committee kaba rim ba la ialam da u CEM barim u Bah Titosstarwell Chyne kiba kynthup ia u Bah Gigur Myrthong, ka Kong Grace Mary Kharpuri, ka Kong Macdalyn Sawkmie Mawlong, u Bah Rangkynsai Kharbuki, u Bah Teiborlang Pathaw bad u Bah Victor Ranee.
Ki ar ngut ki khmat thymmai kiba la ioh rung hapoh ka Executive Committee kiba dei hi na ka NPP ki kynthup ia u MDC jong ka Mawsynram u Bah Alvin K Sawkmie bad u MDC jong ka Laitumkhrah-Malki u Bah Fantin Joseph Lakadong.
