Shillong, Rymphang, 13: Ka Young Minds Association ka la ai nam ai burom ia u Dr. DD Lapang uba la long teng u Myntri Rangbah barim jong ka jylla bad u nongialam ba pawkhmat ha them Ribhoi,da kaba tei ia u durmot ba shi rynieng ha phyllaw jong ka Ri Bhoi College ha Nongpoh.
Ha kane ka sngi, u Symbud Myntri Rangbah ka Jylla uba khmih ia ka tnat Kam Pohing u Bah Prestone Tynsong, u la long kum u kongsan ha ryngkat ka jingsakhi lang jong u MLA ka Nongpoh Constituency Bah Mayral Born Syiem kum u Symbud Kongsan, ka Myntri ka koit ka khiah ka Dr. Ampareen Lyngdoh, u MLA jong ka Mawhati Constituency Bah Charles Marngar, u President jong ka Young Minds Association of Ri Bhoi Bah Isynei Hinge bad kiwei kiwei.
Ia une u durmot, la plie paidbah da u Bah Prestone Tynsong ryngkat bad u Dr. D.D. Lapang da ka jingsakhi lang jong ki bahaing hasem.
Haba kren ha kane ka sngi, u Dr. D.D. Lapang u la pynpaw ka jingsngewnguh ia ki nongialam bad ia ki dkhot jong ka Young Minds Association of Ri Bhoi kiba la ai burom ia u da kaba tei ia u durmot, kaba long kum ka jingai burom ia ka jinglong nongmihkhmat bad nongialam uba la noh synniang sha u sup u thiar jong ka them Ribhoi bad ha ka jylla.
U la ong ruh ba ka jingshakri ia ki paidbah ka them Ribhoi bad ia ka jylla Meghalaya kam pat kut namar katba u dang im un dang iai trei na ka bynta ka bha ka miat jong ki paidbah.
U Bah Prestone Tynsong haba kren ha kane ka sngi, u la iaroh ia u synniang u bynhei ba u Dr. DD Lapang u la noh ym tang ha ka them Ribhoi bad ha ka Jylla Meghalaya hynrei wat ha ka ri da ka jingaiti lut ia ka mynsiem shakri ia ka bha ka miat jong ki paidbah nongshong shnong ka jylla bad ha ka ri.
