Shillong, Rymphang, 14: Ka Hynñiewtrep Achik National Movement ha ka sngi Balang ka la aiti da ka dorkhas ha u Lamphang jong ka Ingdorbar Thawain ka Jylla u Thomas A. Sangma da ka jingkyrpad ban pynshlur ia ki dkhot jong ka Ingdorbar Thawaiñ ba kin kren da ka ktien Khasi bad Garo haba ki iashim bynta ha ki jingiatai katkum ba la ai jingbit da ka Rules of Procedures and Conduct of Bussiness, ha ka Dorbar Mang Tyngka jong ka Ingdorbar Thawain ka Jylla ka ban sdang naduh ka 16 tarik mynta u bnai.
U President ka seng, Bah Lamphrang Kharbani ha ka jingiakren bad ki lad pathai khubor u la ong, “kam myntoi ban shu phah tang ia ka “Resolution” sha ka Sorkar India ban pynrung ia ka Ktien Khasi bad Garo ha ka Khyrnit Baphra jong ka Riti Synshar ka Ri Inda, hynrei kaba donkam ka long ba ka Ingdorbar Thawaiñ ka dei ban sdang ban iakren bad ban iathir iatai da ka ktien Khasi bad ka ktien Garo ha ki sngi shong dorbar.”
U la ong ruh, “lada ka don ka jingeh ha kaba iadei bad ka jingbym sngewthuh ia ka ktien, ka Ophis jong u Lamphang ka Ingdorbar Thawaiñ ka dei ban buh da u nongpylla ktien (translator) khnang ban pynsuk ia ka jingiashim bynta jong ki dkhot ka Ingdorbar Thawaiñ.”
Ha kaba iadei bad ka jingdawa ban pynrung ia ka Ktien Khasi bad Garo ha ka Khyrnit Baphra jong ka Riti Synshar ka Ri India, u President ka HANM u la ong baka seng kan sa nang iai buddien shwa ban shim ia ka rai ban pynlong biang ia ka jingiakhih ha nongbah Delhi ha ka wat kaba ar.
