Shillong, Nohprah, 18: Ka khuid ka suba ka dei ka spah bah jong ka koit ka khiah, kumta u Khasi naduh ki por u mynbarim u la hikai ban leh khuid bad leh suba la ka long ha iing ha sem ne ha shnong ha thaw, hynrei ka Sorkar India ka dang kyndit bynriew mynta dang tang khyndiat por ban wanrah ia ka swatch Bharat.
Ia kane la ong da u President ka Synjuk ki Rangbah Shnong Nongthymmai Pyllun Bah Bantylli Nari haba kren ha ka jingialang kaba u Chief Executive Member ka KHADC Bah Pyniaid Sing Syiem u la aiti ia ka kali kit ñiut sha ka Dorbar Shnong Rynjah kaba la pynlong ruh ia ka jingpynkhuid shnong ha ka Lah Sngi u Blei.
U Bah Pyniaid u la pynioh ia ka Kali kit niut lyngba ka Chief Minister Development Fund (CMDF).
Nalor u Bah Pyniaid la sakhi lang ruh da u Syiem ka Hima Mylliem u Paiem Ainam Manik Syiem, ki nongialam ka Synjuk ki Rangbah Shnong Nongthymmai Pyllun, ki paidbah ka shnong lem bad ki nong shong dukan.
U Pa’iem Ainam uba la long kum u Symbud Kongsan u la noh synñiang T. 25 hajar sha ka Dorbar Shnong Rynjah kum ka jingkyrshan ia ki jingpynlut pynsep ha kane ka jingpynkhuid shnong.
Ha kane ka sngi na ka liang jong ka Dorbar Shnong ka la leh burom kyrpang ia ki ASHA, ki Aganwadi bad ia ki Helper kiba la trei shitom bad kiba long ruh ki paia bad ki rishot jong ka Dorbar Shnong kiba ju leit rung manla ka thliew iing haba ki donkam ban iarap ia ki longkmie kiba armet bad ia ki khunlung.
Haba kren kum u kongsan, u Bah Pyniaid Sing Syiem u la pynpaw ba ka KHADC naduh ba la wanrah ïa ka Solid Waste Management Act 2020 ka District Council ka la lah ban ïarap da ki kali kit ñuit sha kiba bun ki Dorbar Shnong kiba hap hapoh ka jylli treikam jong ka Khasi Hills Autonomous District Council, kata ha East Khasi Hills, Ribhoi, West, South West bad Eastern West Khasi Hills District.
Ha kane kajuh ka sngi, u MDC jong ka Mawkhar-Pynthorumkhrah Constituency Bah Pynshngaiñ N Syiem u la aiti da ka trok kit ñiut sha ka Dorbar Shnong Golflink Pynthorumkhrah kaba u la pynioh lyngba ka 15th Finance Commission Tide Grand 2022-23, kaba dei ruh ka sngi ba ka Dorbar Shnong Golflink Pynthorumkhrah ka la pynlong ia ka jingpynkhuid shnong.
Ha ka jingaiti ia kane ka trok kit niut la sakhi lang da u Rangbah Shnong u Bah Micheal Hek, ki nongialam shnong, ki seng samla bad kumjuh ruh ki seng longkmie.
