Shillong, Nohprah, 18: Ka Bouncers Association of Meghalaya bad ka Teilang Welfare Society (TWS) da ka jingkyrshan jong ka Directorate of Sport and Youth Affairs ka Sorkar Jylla kin sa pynlong ia ka Shillong Arms Fight All India Championship kaba lai sngi lynter ha nongbah Shillong.
U President jong ka BAM Bah June Star Kharbuli ha ka jingiakren bad ki lad pathai khuor u la iathuh ba kane ka rynsan iakhun kti kan sdang ha ka 19 tarik bad yn pynkut ha ka 23 tarik myntu bnai Nohprah. Ka jaka ban pynlong ia kane ka lympung iakhun kan sa long ha State Central Library, Shillong.
Ban khring shuh shuh ia ki paidbah u Bah Kharbuli u la iathuh ba kin sa don ki khlur akphlim jong ka Bollywood ba kynthup ia ka Preeti Jhangiani bad u Parvin Dabas ki ban sa wan sakhi lang ha kine ki sngi.
Shuh shuh u la pyntip ba ka khusnam Champion of the Champion na ka bynta ki shynrang ka long T.25 hajar, katba ia ki kynthei ka khusnam ka long T.20 hajar bad ki don ruh ki khusnam na ka bynta ki nongjop ha ki kyrdan bapher bapher.
U Bah Kharbuli, u laiathuh ba ha kane ka rynsan iakhun la plie lad ruh ia ki rang bad ki thei iakhu kti kiba don jingduna ha ki dkhot met.
Katkum ka jingiathuh jong u Bah Kharbuli, ki nongiashim bynta nabar ka jylla ki kynthup na ka jylla Uttar Pradesh, nongbah Delhi, nongbah Mumbai, Jylla Kerela bad Haryana.
