Shillong, Risaw 24: Ki nongialam jong ka Kur Kharbuki na ka shnong Lawmei, ki la pynshai ba u Syiem jong ka Hima Mylliem u Paiem Ainam Manik Syiem um shym la leh donbor satia ha kaba iadei bad ka jingpynkhamti ia ka Sanad ha u Bah Zuberstar Kharbuki ban shimti kum u Myntri ba thymmai jong ka Kur Kharbuki.
Kane ka jingpynshai jong ka Kur Kharbuki na Lawmei ka long hadien ba ki nongialam jong ka Kur Kharbuki na ka thaiñ Mawpat bad na ka shnong Umsning ki la mih shakhmat ban pyrshah jur ia ka jingai sanad bad ki la ai por haduh ka 26 tarik mynta u bnai ia u Syiem jong ka Hima Mylliem ban pyndam noh mardor ia ka jingai Sanad ha u Bah Zuberstar Kharbuki hynrei lym kumta kin pynlong da ka jingshah thngan hakhmat ka ophis treikam jong u Syiem ka Hima Mylliem kaba don ha Mawkhar, Shillong.
Ha u kyrwoh ba la phah da ka Kur Kharbuki, ki nongialam jong ka Kur Kharbuki ki la ong ba ka jingkynnoh pyrshah ia u Syiem jong ka Hima ba u shu leh donbor ka dei tang ka jingkynnoh ka bym don nongrim namar ba ka jingjied ia u Bah Zuberstar Kharbuki ban shimti bujli kum u Myntri jong ka Kur Kharbuki ka long da ka jingiahun lang na baroh ki kur Kharbuki kiba la iashim bynta ha ka Dorbar Kur kaba la long ha ka 19 tarik, Nailar mynta u snem.
