Shillong, Nailur, 05: U Timothy Jones Dhar, u nonghikai ha ITI Shillong bad u Madhav Singh u nonghikai ia ka Sobjek Science ha Alpha English HS School ki long ki arngut na Meghalaya napdeng ki 75 ngut ki nonghikai na kylleng ka ri kiba la shah jied ban ioh pdiang ia ka National Teachers’ Award ha ka 5 tarik, Nailur, 2023 ha New Delhi.
U Babu Dhar u dei uba tbit bha ha ka jinghikai shna kali ha ka ITI Shillong bad um shym la poi pyrkhat ba un shah jied ban ioh pdiang ia kane ka khusnam watla u trei minot thop manla ka sngi ha ka karkhana shna kali.
Une u Babu u dei u Mechanic shna kali ha Jowai, West Jaintia Hills ha ki snem 1998. U la shah thung kum u Mechanic Motor Vehicle Inspector ha Shillong Industrial Training Institute, Rynjah naduh u snem 2013.
“Nga sngewkyndit ban ioh ia kane ka jingithuh. Nga la pyrshang ban leh ia kaba bha tam ha ka kam ba nga trei kum u mekhanik ka long kaei kaei kaba ngam lah ban sngewthuh. Nga ju dwai ba ngan iai bteng ban ioh ia ka lad ban shakri bad ban hikai,” ong u Babu Dhar.
U Babu Madhav, u dei u khun jong u Sidheswar Singh bad ka Champa Devi kiba sah ha Nongpoh. U la pyndep ia ka jingpule ha Ri-Bhoi bad u la pyndep ia ka M.Sc (Botany), B. Ed bad mynta u la jan pyndep ruh wat ia ka jingpule LLB.
Ka President Droupadi Murmu kan sa pynkup burom da ka National Teachers’ Award 2023 sha ki 75 ngut ki nonghikai na kylleng ka ri ha ka jingialang ka ban sa long ha Vigyan Bhawan, New Delhi ha ka jingrakhe ia ka sngi burom jong ki nonghikai.
