Shillong, Rymphang, 16: Ka lympung ialehkai Cricket jong ka 2nd bad ka 3rd Division bad la pynlong da ka Shillong Cricket Association da ka jingiatrei lang bad ka Samkhamti ka la poi noh sha kaba kut ha ka sngi Thohdieng ia kaba la pynlong ha madan Urkaliar, Shillong.
Ha ka jinglehkai jong ka 2nd Division, ka kynhun ialehkai Golflink ka la pynliem noh ia ka kynhun ialehkai Metalica bad da kane ka jingjop ka Golflink ka la iohrung sha ka lympung ialehkai First Division. Katba ha ka jinglehkai jong ka 3rd Division ka Lawsohtun ka la pynliem noh ia ka Metalica Rising bad da kane ka jingjop ka Lawsohtun mynta ka la kiew sha ka kyrdan ialehkai jong ka 2nd Division.
Ha kane ka sngi, ka sakhi lang da u Bah Samborlang Diengdoh uba la long kum u Kongsan, u Secretary jong ka Meghalaya Cricket Association Bah Gideon Kharkangor kum u Symbud Kongsan, u MDC jong ka Laban u Bah Mitchel Wankhar uba la long kum u kongsan ba kyrpang, ki nongpyniaid jong ka Shillong Cricket Association ba kynthup ia u President u Bah Peter MacDonald Kharsawian, u General Secretary Bah Banri kharmalki, u Vice President u Amit Singhania bad kiwei kiwei.
La sam ruh ia ka khusnam Player of the match ha ka 3rd division ba la ioh da u samla Hilar Thabah na ka Lawsohtun bad ia ka khusnam Player of the series la ioh rah da u samla Greatestful Lyngkhoi na ka Lawsohtun.
Ha ka 2nd division, ia ka khusnam player of the match la iohrah da u Asif na ka Golflink bad ia ka khusnam player of the series la iohrah da u Pritam Singh na ka Golflink.
