Shillong, Rymphang, 26: Ka Khasi Students Union (KSU) Nongpoh Circle ha ka Sngi Saitjaiñ jong ka taiew baladep ki la hiar jurip ha iew Nongpoh hadien ba ki la ioh ujor na kiba bun ki kmie ki kpa jong ki khynnah skul ba ki nongdie kot ha kane ka iew ki la shim kabu shaba palat da kaba die tam na ka dor ba la buh bad kane ka la buh jingeh bha ia ki longiing kiba duk ba rangli.
Ha ka jingjurip, ka seng ka la lap ba ki nongdie kot ki die tam ia ki kot na ka dor ba la buh da kaba aidaw ba ki la lut bun ha ka bai kit ïa ki kot.
Na ka liang jong ka seng hapoh ka jingïalam jong u Secretary ka KSU Nongpoh Circle u samla Baiashanlang Kharshanlor ka leit ban ujor ha u Deputy Commissioner jong ka Ri Bhoi District u Arpit Upadhyaya ha kaba u Deputy Commissioner u la kular ban shimkhia ïa kane ka kam.
