Shillong, Naiwieng, 11: Ka North Eastern Hill University Students Union (NEHUSU) ha ka Lah Sngi u Blei ka la phah da ka ujor sha ka President ka ri India ka Droupadi Murmu halor ka jingjahrngai jong u Vice Chancellor u Prof. PS Shukla wat hapdeng ka jinglong jingman bad ka jingïakhih jong ki samla pule ka skulbah NEHU.
La ïoh jingtip ba u Vice Chancellor ka skulbah NEHU u Prof. PS Shukla u la jah rngai hadien ba ki riewshim kabu ki la leit ban pynpra ïa ki jingkhang iit, ban pynjulor ïa ka kali bad wiang ding ïa ki CCTV Camera bad pynjulor ïa ki post elektrik ha ka step phyrngap sngi u Blei ha ka por kumba 2:00 baje mynstep.
Ki samla pule bad ki nonghikai jong ka skulbah NEHU ki la ïoh jingtip ïa kane ka jingjia na u Magistrate uba la pakhang lynti ïa ki samla pule bad ïa ki nonghikai kiba tur sha ka ing sah jong u Vice Chancellor ha ka sngi u Blei.
Ka jingïakhih shah thngan da ki samla pule ka skulbah NEHU ka la kynjoh sha ka sngi kaba hynriew. Ki la don ruh ki samla pule shynrang bad kynthei kiba la kem pang namar ka jingtlot jong ka met ha kaba la pynkit noh ïa ki sha Civil Hospital, Shillong bad sha NEIGRIHMS Hospital.
“La hynñiew sngi kynthih (146 kynta) ba la sdang ka jingïakhih shah thngan, wat hapdeng ka jingïakhih ba jlan jong ki samla pule, u Vice Chancellor um shym la lah ban pyndep ïa ka kamram kaba la bynshet ha u. Ka jingjah rngai jong u VC khlem da pyntip bad khlem ai jingtip ka long kaba sngewkhia bad ka pynpaw ïa ka jingbym lah jong u ban long u nongïalam bad ka jingbym lah jong u ban shah ïa kine ki jingjia. Ha ka jaka ban weng ïa ki jingeh namar ka jingpynlong ïa ka jingshah thngan, ka jingjah rngai jong u Vice Chancellor napoh ka skulbah ka pyni ba um don jingkitkhlieh eiei ruh em,” ong ka NEHUSU ha ka jingujor ba la soi lang da ki nongïalam ka KSU NEHU Unit.
Ka NEHUSU ka la pyntip ruh ïa ka jinglong jingman ha ka koit ka khiah jong ki samla pule namar ka jingpynlong ïa ka jingshah thngan bad ong ruh ba ka jingjah rngai u Vice Chancellor ka la buh ïa ki samla pule ha ka umdum namarba kim tip lano un wan phai.
Ka NEHUSU ka la pyntip ruh ba ki eksamin Undergraduate ki la jan sdang bad ka jingbym don jong u Vice Chancellor ka la buh jingeh ïa ki College kiba pynïasnoh bad ka skulbah NEHU.
“Kane kam dei shuh ka sien kaba nyngkong. U Vice Chancellor u ju jah rngai bad um ju ai jubab haba don kino kino ki jingjia (hapoh ka skulbah). Ki jingbym lah jong u ban pyndep hok ïa ka kamram ha ki khep ba donkam ka la pyndiaw mynsiem ïa ki samla pule,”ong shuh shuh ka jingujor.
“Kum ki samla pule ngim don shuh ka jingshaniah ha une u Vice Chancellor namarba um long shuh uba bit ban ïalam ïa ka skulbah. Ka jingbym lah treikam, ka jingbym shah skhor bad ka jingbym peit ïa ka bha ka miat jong ki samla pule ka la ktah bha haduh katta katta ïa ka skulbah,” ong kine ki ar tylli ki seng jong ki samla pule.
“Ka Union, namarkata, ka kyrpad ban weng noh mardor ïa u Vice Chancellor na ka shuki, namarba u la pynpaw ïa ka jingbym lah ban shim ïa ka jingkitkhlieh ïa ka kam ba la bynshet. Ngi kyrpad ïa phi ban leh noh eiei kham kloi khnang ban pynthikna ba ka jingtreikam jong ka skulbah kan ïaid shakhmat na ka bynta ka jingmyntoi bad ka bha ka miat jong ki samla pule,” la kyrpad ka NEHUSU bad ka KSU ïa ka President jong ka ri.
