Shillong, Risaw 27: Ka Meghalaya Peoples United Front (MPUF) ha ka sngi thohdieng ka la kynnoh ba ka jingpyrshang jong ka Sorkar Meghalaya Democratic Alliance (MDA) ba la ialam da ka National Peoples Party (NPP) ban pynpoi ia ka lynti Rel sha East Jaiñtia Hills District ka long tang ban pynkamai spah ia ki katto katne hynrei ym ia u paidbah ba bun balang.
“Ngi kren da kaba shai, ba ka seng kam don jingpyrshah eiei ia ka roi ka par hynrei lada ka Sorkar Jylla ka thmu ban pynpoi ia ka lynti Rel ha East Jaiñtia Hills District ka dei ban pynbiang shwa ia ki aiñ kiba pyrkhing ia ka jingwanrung kyrthep jong ki mynder bad ba ka dei ban pyni shwa sha ki paidbah ba ka jingthmu ka dei ban long kaba shai,” ong u President ka MPUF u Bah Dawanpoimi Laloo ha ka jingiakren bad ki lad pathai khubor ha nongbah Shillong.
“Namarba ngi iohi, lehse ka jingtmu ban wanrah ia ka lynti Rel ka long tang na ka bynta ka jingmyntoi jongno re jongno. Kane ka jingthmu ka long ban pyntuid ia ka spah ka phew ha kaba iadei bad ki marpohkhyndew na East Jaiñtia Hills sha ki jylla rithor,” u la ong.
Haba iaiban ia ka jingdawa ban wanrah ia ka aiñ bapyrkhing, une u nongialam ka MPUF u la ong, “ngin ym ailad bad ngin ym aili iano iano ban leh ia kano kano ka kam kaba ktah ia ka imlang ka sahlang bad shwa ban wanrah ia ka lynti Rel dei ban ai shwa ia ngi ia ka Inner Line Permit (ILP) ne ia kino kino ki ain ki ban iada khnang ba ngin ym shah tyllep ha ka jingwan jong ka Rel.”
“Ngi phah ruh ia u kyrwoh uba shai sha ka Sorkar, lada phim lah ban ai ka jingkular ia ngi, ka seng kan ym ailad ban phin iaid shakhmat ba ka Rel kan wan shapoh ka jylla bad khamtam eh hapoh East Jaiñtia Hills,” u la bynrap.
Ha u Naitung, mynta u snem ka MPUF ka la phah ia ka dorkhas sha ka Sorkar Jylla lyngba u Deputy Commisioner jong ka East Jaiñtia Hills ban pynpaw ka jingpyrshah ia ka jingthmu ban pynpoi ia ka lynti Rel khlem da pyntreikam shwa da ki aiñ kiba pyrkhing.
Katkum ka jingong jong u Bah Laloo, ka seng ka iohi lada wan ka Rel, kan ktah wat ia ka ioh ka kot jong ki trai kali kiba ju im kamai jakpoh ban buh ia ki trok kit mar bad ia kiba treikam lajong. “Ngi khot ia ki trai kali ba kin iasnohkti lang bad ngi ban pyrshah ia ka jingwan ka Rel sha East Jaiñtia Hills namarba ngim iohi ba kan don ka jingmyntoi na ka jingwan ka Rel hynrei tang ki jingktah suda,” u la ong shuh shuh.
U la iathuh ba ka seng kan sa leit ban iakynduh ia u Myntri Rangbah ka Jylla u Conrad K. Sangma ban pynpaw ia kane ka jingsngew.
Haba kylli, u Bah Laloo, u la ong, “ki MLA ha rilum Jaiñtia kim ju don jingiatylli bad kim ju pyrkhat ia u paidbah hynrei ki pyrkhat tang ia ka malade shimet. Lada donkam ngin iakren (bad ki MLA jong ka rilum Jaiñtia) bad lada kim sngap ngin wer ia u paidbah ban ym ailad ia ki ban pynjot. Ngi kwah ruh ban tip ia ka buit barieh jong ki namarba lada pynpoi ia ka Rel kan kjit lut ia ka spah East Jaiñtia Hills bad kan kut syndon. Ngi tieng ia kane bad ngi kwah ia ka jingpynshai bad ba ka jingthmu ka dei ban long beit na ka bynta u paidbah hynrei ym na ka bynta ka jingmyntoi jong ki katto katne ngut.”
U President ka MPUF-East Jaiñtia Hills District Unit Bah Kyrshan Blah u la ong, “ka East Jaiñtia Hills ka dei kaba don markhap bad ka ri Bangladesh, ka jingrung kyrthep jong ki mynder ri ka jur bha haduh mynta. Ka East Jaiñtia Hills ka dang bun ki jingduna naduh ki Hospital, ki skul bad ki kolej sorkar bad kiwei kiwei ki jingduna namarkata ka jingthmu ban pynpoi ia ka rel kam pynmyntoi eiei ruh em.”
“Ngi kyrpad ia u MLA jong ka Khliehriat Constituency Bah Kyrmen Shylla uba long ruh u Myntri jong ka Sorkar Jylla bad ia ka MLA jong ka Sutnga-Saipung Constituency Kong Santa Mary Shylla ba kin pynsngew sha ka Sorkar halor ka jingpyrshah jong ki paidbah ban pynpoi ia ka Rel namarba ka jingbuhai shnong jong ki bar jylla bad ka jingrung tuh jong ki mynder ri sha East Jaiñtia Hills ka jur bha namarba ym don ba peitngor bad ym don ba tehlakam,” la ong u Bah Blah bad bynrap, “ki bar jylla ki treikam laitluid ha East Jaiñtia Hills namarba don kiba kyrshan ia ki nadien.”
