Shillong, K’lyngkot 22: U President jong ka Voice of the People Party (VPP) Bah Ardent Miler Basaiawmoit ha ka Lah sngi U Blei u la ong ba ka jingdon jong ki nongialam ka VPP ka la biang ban pyntip sha ka Sorkar ba u paidbah um shah ia ka Sorkar nangne shakhmat ban leh katba mon.
Haba kren sha ki nongkyrshan kiba la synran lang ha ka jingtur sha Secretariat ban dawa ia ka Sorkar ba kan thung biang ia ki lai ngut ki ophisar kiba la shah weng kam na ka Meghalaya Lok Ayukta, u Bah Ardent u la ong, “ha kaba iadei bad ka jingweng ia (lai ngut) ki Ophisar na ka Lok Ayukta, ngi la ai ka jingthoh bad ngi la buh ka por ban iakhih. Nga kwah ba ki paidbah kin shai, balei ngi iakhih haba don ba pynthud ia ka Lok Ayukta. Kane ka dei kata ka bor ba la buh ban tohkit ia ki kam bamsap bad ban pynshitom ia kiba bamsap.”
“Ia kino kino kiba ktah ia ka Lok Ayukta ngin hap ban iakhih kum ka party,” la ong u Bah Ardent.
“Kum ka party kaba ieng ha ka nongrim ban iakhun pyrshah ia ka bamsap, ha ki khyndiat ka Sorkar ka la pyrshang ban pynsngewthuh bakla ia u paidbah ban ong ba ngi, ngi ngim tip eiei ia ka Lok Ayukta Act, dei ban pule bha ia ka Act, hynrei ngi, ngi ong ba ngim dei ki khynnah skul, ngi ladep ban pule ia ka Act, ka shah ia ngi,” u la ong bad bynrap, “hadien ba ngi la peit ia ka Lok Ayukta Act, ngi la pule ia ki Rules, ngi shem ba kane ka jingleh jong ka Sorkar ka long kaba bakla.”
Haba kynthoh ia ka jingpynjari ki bor synshar District ia ka Section 144 CrPC, u Bah Ardent u la ong, ‘ha u snenm 1967 ka la pynmih ia kawei ka rai halor ka jingpyntreikam ia ka Section 144 CrPC, ka la kren shai ba kane ka Section ym lah ban pyntreikam kum ka atiar kaba khang ban ia ka jingpynsngew bad ia ki jingeh.”
“Lada phi weng ia kine ki ophisar, ngi la ong hynne, niuma lada kam don kano kano ka case ngim ong eiei, hynrei ka don ka case kaba kine ki ophisar ki la tohkit ha kaba u bahaing jong u Myntri Rangbah ka Jylla u don bynta ha kata ka kam bamsap bad ngi donhok ban suba jur ba ka don ka jingthmu ban iada ia uta u bahaing jong uta u Chief Minister,” ong u Bah Ardent.
“Ngim lah ban shu ailad namar lada tuh uba rit la shah kem wut wut, kumno yn iada tangba ki dei ki bahaing hasem” u la ong.
“Ka thma jong ngi pyrshah ia ka bamsap kam dei kaba ngi shu kren hynrei ngi da thrang namar lada ngim lah ban rat ha kane ka por ka jong ngi, ka jylla jong ngi kan ngam. Wat ju tieng, haba ngi mih halor ka hok, haba ngi mih ngi sngewthuh ia ka nongrim kaba skhem,” la pynpaw u Bah Ardent.
“Ngi donkam ban pynkhlaiñ ia ka Lokayukta Act ha kane ka jylla jong ngi,” u la ong bad bynrap, “wat mushlia ia ka Lokayukta, bad phin sa iohi kin sa bun ki ban poi (sha) ruh nar.”
