Shillong, K’lyngkot, 22: Ka Myntri jong ka Sorkar Jylla kaba peit ia ka tnad Aiñ ka Dr. Mazel Ampareen Lyngdoh kam shym lah ban shim ia kano kano ka rai ha ka jingiakynduh ia ki nongialam jong ka Voice of the People Party (VPP) ha ka Lah Sngi u Blei kiba la tur paidbah sha Secretariat ha ka sien kaba ar ban pyrshah ia ka jingweng ia ki lai ngut ki Ophisar na ka Meghalaya Lok Ayukta.
Shwa ban leit iashim bynta ha ka jingiakren bad ka Myntri, u Bah Ardent kynthup ruh lai ngut ki MLA ka VPP u Bah Adelbert Nongrum, Bah Brightstarwell Marbaniang, Bah Heavingstone Kharpran, ki nongialam ba hakhmat ka Party bad ki nongkyrshan ki la shah pakhang lynti ha ki Magistrate bad ha ki bor Pulit tang shu poi hakhmat ka Ophis Additional Secretariat.
U Nongialam jong ka VPP Bah Ardent Miller Basaiawmoit, haba kren sha ki nongkyrshan kiba ap ha Parking Lot, Additional Secretariat, hadien ba la wan phai na ka jingiakynduh ia ka Myntri, u la ong, “ngi la ia ka jingthoh bad ka Sorkar ka ong ba ngim lah ma ngi ban thung, la thung namarba ka Lok Ayukta ka dei ka Autonomous Body ne ka tnat treikam kaba laitluid ym lah ban tuklar.”
“Hynrei ha ka Notification kaba u Chairman jong ka Lok Ayukta u weng ia kita ki ophisar, la weng da ka jingbthah jong ka Sorkar. Hangno yn ong ba kam lah ban tuklar kata ka Sorkar,” la buh jingkylli u Bah Ardent ia ka Sorkar MDA.
“Haba ki khot ban iakren ia ngi, ngi kloi ban leit, namarba ngim kwah ban pynmih ia kano kano ka jingkulmar. Ngi tip ba ka Myntri ka tnat Aiñ kam lah ban ai rai eiei. Kata ka shai ia ngi kum ki nongialam hynrei ngi kwah ban pyni ba ngi don ia ka jingshisha kum ki nongialam ban iathuh balei ba ngi hap ban mih madan na ka jingbakla jong ka Sorkar,” u la ong.
“Ka party ka la buh shibun ki jingkylli bad na ka liang jong ka Myntri bad ia u Ophisar uba don lang ki ong ba ka long kaba donkam ba u Myntri Rangbah un don lang, u Chief Secretary un don lang lem bad kiwei kiwei ki tnat treikam ba ngin iakren halor kane. Ka jingong jong ki ba ki donkam iakynduh ryngkat bad u Myntri Rangbah bad ki Ophisar kiba kham heh ka pyni ba ki sngewthuh ba ka don ka jingbakla ha ka jingweng ia ki (lai ngut) ophisar,” la pynksan u Bah Ardent.
“Hadien ba ngi la pyni, ia ki, ia ki kyndon, kiba ngi la iakren katkum ka ain, ka la buh jingeh ia ki ban ong ba ka jingleh jong ka Sorkar kam long kaba bakla. Ka Myntri ka la kyrpad ia ngi ban iakynduh bad u Myntri Rangbah uba (pynpaw) ma u ruh u don ka jingkwah ban iakynduh ia ki nongialam ka VPP. Dei halor kata ka nongrim ba ngi la mynjur ban iakynduh ban ia pynbeit ia kane ka kam,” la bynrap u Bah Ardent.
