Shillong, K’lyngkot, 18: Hadien shi snem ba la pynmih ia ka phlim “Khat Saw Phra 14/8” uwei na ki nongshna phlim batbit na ka jylla, u Bah Kenny Lyngdoh, u la pynkhreh ban wanlam biang sha ki paidbah ia ka phlim ka ban pyniapbiej bad ka ban pynsah ia ki paid nongpeit ha ka jinglyngngoh (suspense thriller).
Kum ban shu pynkynmaw, u Bah Kenny u la don bynta ban pynmih ia ka phlim “Gangs of North East (2017)” bad ban shna ia ka phlim “AHOR (2022).”
Ha ka phlim ‘Unveiling Shadows (RNGAI)’, la iashim bynta da kawei napdeng ki puron ba pawnam ka Regina Lamo. Ka phlim ka iathuh khana shaphang ka jingban khia ka jingsngewsih jong ka hadien ka jingshahpynïap ka kmie bad ba iadei shipara bad ka. Ha kum kane ka jingshem lanot jong ka, ka don ka jingthmu ban wad ia ka tynrai bad ka daw jong ka jingshah pyniap ki baieid bathoiñ jong ka. Ha ka jingiaid lynti jong ka ban wad ïa ka jingshisha, ka shem ïa kiei kiei kiba pynher syrngiew ïa ka.
U Bah Kenny Lyngdoh u ong, “lane ka phlim ka pyni ba ia kiei kiei baroh kam long kumba ngi mut ne iohi nabar. Kane ka phlim ka iathuh khana ia ka jingiaid lynti jong ka puron bad ka jingshem jong ka ïa kiba bun ki jingpynthame, ki jingartatien.”
Ka puron Regina Lamo kan iatreilang bad u nongshna phlim Kenny Lyngdoh.
Ha kane ka phlim yn iohi ruh ïa kiwei kiwei ki tyngshop bad ki puron kiba paw kum Jeremy Khongjee, ka Banatimon Mawlong, u Mangkara Khongthohrem, u Brandon Sunn, ka Phidalin Kharsyntiew, u Mewanpynbhalang Tham bad kiwei kiwei ruh.
Ia ka ‘teaser’ jong kane ka phlim ladep ban pyllait ha YouTube channel bad ia ka phlim yn pyllait ha u bnai Rymphang.
