Ka Garo Students’ Union ka la kynnoh ba ka jingiakhih Reservation Policy jong ka Voice of the People Party lane ka VPP ka dei tang ka kam politik. Katei ka sengbhalang na ri lum Garo ka la pynrem jur ia ka VPP da kaba kynnoh ba ka pynkylla politik ia kane ka mat hynrei kam shym la wanrah pat ia ka jingtip kaba shai bad kaba shisha sha ki paidbah. Ka kyrwoh khubor na katei ka seng ka la ong ba kane ka jingleh jong ka VPP ka lah ban pynkylla ia ka Meghalaya kum ka Manipur lane kham sniew shuh shuh ia ka Manipur ruh.
Ka GSU lyngba ka kyrwoh khubor ba la soi da u Zikku Balgra N. Marak uba dei u President ka la ong ba ka VPP kam shym la pyni sha ki paidbah ia ki jingkhein kiba biang ban pynshisha ia ka jingkam jong ka halor ka thungkam thungjam. Katei ka seng kam shym pdiang ia ka jingkynnoh ba ki Khasi ki shah lehbein bad shah leh shilliang khmat bad ka la ong ba kitei baroh ki jingkren lah ban sakhi la ki dei ne-em kiba shisha haba peit ia kiba paw tyngkrein shabar.
Halor ka jingkam jong ka VPP ba ki samla Khasi ki kyrduh kam kyrduh jam, ka GSU ruh ka la ong ba ki samla Garo ki ngat ha kajuh ka apot bad ki kyrduh kam kyrduh jam bad kiba kham shem jingeh ha ka ioh kam lei ka la ong ba ki dei ki Garo. Ka GSU ka la ong ba ki Khasi lei ki long kum ki khun khatduh jong ka Meghalaya naduh ba ioh jylla lajong bad kata ka jingkynnoh jong ka VPP ba ki shah lehbein ka dei ka jingkynnoh kaba khlem nongrim.
Halor kitei kiei kiei baroh , ka GSU ka la ong ba sngew donkam ban buh ia ki jingdawa jong ka hakhmat ka sorkar. Ka jingdawa kaba nyngkong ka long ba ka sorkar ka dei ban ai ka jingkhein kaba biang ba katno tylli ki kam ba ki Garo kim shym la lah ban pyndap ha kine ki 50 snem ba la leit noh, ka la dawa ba ki Garo ki dei ban ioh lut ia ki kam ba ki la duh naduh u snem 1972 haduh mynta katkum ka bhah jong ki, ka la dawa ba ka sorkar ka dei ban sangeh lut ia baroh ki jingthung kam kat bym pat lah ban pyndap ia ki kam kiba dei ki bhah jong ki Garo.
Shuh shuh ki la dawa ba lada ka sorkar ka kwah ban pynbeit thymmai ia ka Reservation Policy ka dei ban thung da u nongbishar ba la shongthait ka Supreme Court ban bishar bniah halor kane ka Reservation Policy bad ba kane ka Reservation Policy kam dei ban ktah ia kano kano ka jaitbynriew bad ba kam dei ruh ban ktah ia ka 40 la 40 kaba dei ka bhah kyrpang na ka bynta ki Khasi bad Garo.
Katei ka seng ka la pynkut ia ka kyrwoh khubor da kaba ong ba lada ym pat lah ban thung kam lut ia baroh ki bhah ba ki Garo kim pat lah pyndap naduh u snem 1972 haduh mynta ym pat dei ban ktah ia ka Reservation Policy bad lada ktah ia kane khlem pep kane ka seng kan leit sha iing bishar ban ioh ia ka bishar hok.
