Ha ka sngi jong ka jinglehniam khatduh ia ka met kaba sah jong u Dr.Andreas Dkhar, u Dr.Mukul Sangma ruh u la donlang. U Dr.Mukul u la ai jingkren ruh ha kane ka jinglehniam khatduh ia u Dr.Andreas, ha ka jingkren jong u, u Dr.Mukul u la iathuh ba u la ia ithuh ithaw bad u Dr.Andreas naduh ki por ba ki dang ia pule lang ha St.Anthony’s College bad nangta ki la ia pule bad sahlang ruh ha ka por ba ki pule doktor ha RIMS ha nongbah Imphal kaba don ha ka jylla Manipur.
Naduh ki por ba ia dang pule bad haduh ki sngi kiba khatduh jong u Dr.Andreas, u Dr.Mukul u la ong ba ka jingialong paralok jong ki ka long kaba jan bha bad man ki por ba u sngew kwah ban tip shaphang ka koit ka khiah jong u nyngkong eh un khot beit tang ia u Dr.Andreas. U Dr,Mukul u la phla ba dei u Dr.Andreas uba pynshlur ia u ban rung sha ka kam sain hima sima. U la iathuh ba sa tang katto katne snem ba u Dr.Andreas un shongthait noh na ka kam bad kumta ka la don ruh ka jingiasyllok bad u ban phai khmat noh sha ka sain pyrthei hynrei kaba sngewsih pat ba u la khlad jyndat noh.
