Shillong, ïaïong, 02: Ka Hynñiewtrep Youths’ Council (HYC) ka la maham tyngeh ia ka ABVP, ka Students’ Wing jong ka BJP bad ia ka World Organisation of Students and Youths (WOSY) ba kim dei ban pynlong ia ka skulbah North Eastern Hill University (NEHU) kum ka rynsan leh politik bad ban pynkha ia ka jingsngew iapher jaitbynriew hapoh kane ka skulbah.
“La pyntip ia ngi ba ka ABVP kaba dei ka Students’ Wing jong ka BJP ka la pyrshang ban rung shapoh ka Campus da kaba pyndonkam ia ka kynhun kaba la tip kum ka World Organisation of Students and Youths (WOSY) bad ban pynlong ia ki prokram da ka jingiatreilang bad ka RSS kum kaba ladep pynsangeh dang shen da ka HYC.
Ka jingrakhe ia ka lehniam Holi hapoh ka Campus da ka WOSY da ka jingiatreilang bad ki dkhot jong ka ABVP/RSS kam dei kaei kaei ruh hynrei ka dei tang ka jingpyrshang ban wanrah ia ka jingsngew iapher jaitbynriew bad ban leh politik ruh ha kajuh ka por. Baroh shikatta ki snem, ki samla pule, ki nonghikai bad ki nongtrei jong ka NEHU ki ju pynlong ia ki tamasa bad kam ju don kano kano ka jingujor. Hynrei ban rakhe ia ki tamasa da ka jingthmu ban wanrah ia ka jingsngew iapher jaitbynriew bad ban leh politik ka long kaei kaei kaba ka HYC kam lah ban pdiang,” ong u kyrwoh ba la phah da u Education Secretary ka HYC (CEC) Bah Enlang Sawian.
“La pyntip ia ngi ba ym shym la ai jingbit ia ka WOSY ban pynlong ia ka prokram bad ban rakhe bad kijuh ki briew ki bym dei ki samla pule jong ka skulbah hapoh ka Campus bad ngi ai ka jingkyrshan bapura ia ka nongrim ba la shim da ki nongkitkam jong ka NEHUSU bad ngi pynrem ia ka jingleh jong kito kiba donkti ban ktah kti ia u Vice-President jong ka NEHUSU. Ngi kyntu ia ki bor Pulit ba kin kem ia ki briew kiba donkti ha ka jingiashoh iadat katkum ki kyndon jong ka aiñ bad ngi kyntu ruh ia ki bor pyniaid jong ka NEHU ban leh da kaba tyngeh ia ki nongpynlong ia ka prokram. Hynrei lym kumta, ka HYC kan shim hi da ki sienjam ban pynthikna ba u lanot un ioh ia ka hok bad ban pynthikna ruh ba ka skulbah ka dei ban leh da kaba tyngeh ia ki nongpynlong prokram,” la ong shuh shuh u Bah Sawian.
Ka HYC ka la kynnoh ruh ba ka ABVP ka la pyrshang ban rung ha NEHU Shillong bad ha Tura Campus da ka jingthmu ban pynphriang ia ka politik jingisih bad ban pynkha ia ka jingsngew iapher jaitbynriew da kaba pyndonkam ia ka WOSY namarba kam lah ban rung hi dalade, namarba ka kynthup ia u samla pule Bangladeshi kum u Jurak uba katkum ka jingioh jingtip jong ngi u dei uba don case ban jrong kti kynshleiñ/ktah kti. Ka ABVP ka la pyrshang ban pynkupbor ia kine ki jaid briew ba la shah wohdong ban rung shapoh ka Campus bad ban leh politik jakhlia hapoh ka skulbah.
“Ka HYC ka maham ia ka ABVP bad ia ka WOSY ba ki dei ban long kiba phikir bad ym ban pyndonkam ia ka NEHU na ka bynta ki Agenda politik bad ban pynkha ia ka jingsngew iapher jaitbynriew hapoh ka skulbah. Ngin ym shah ia ki briew ne ia ki kynhun kiba thmu ban pynjngut ia ka kyrteng jong ka NEHU bad ia ka jylla jong ngi baroh kawei namarba kum ka NEHU kam ju shah satia ia kum kine ki kynhun ban iashim bynta ha ki politik jong ki samla haduh mynta. Ngi kwah ruh ban iohi ba ka status quo kan iai neh wat ha ki snem ki ban sa wan,” la ong shuh shuh ka HYC.
“Ngi kyntu ia ki samla pule jong ka NEHU ban long kiba peitngor bad ban leh eiei khnang ban pynthikna ba ka skulbah ka dei ban long kaba laitluid na ki Political Agenda bym larkam jong kine ki ar jait ki kynhun ne ki briew,” la bynrap ka HYC.
