Shillong, K’lyngkot 22: U President ka Voice of the People Party (VPP) Bah Ardent Miller Basaiawmoit ha ka Lah Sngi u Blei u la ong ba ka party kan sa ujor sha ka Privilege Committee jong ka Iingdorbar Thawain ka jylla halor ka jingjrong kti jong ki Pulit ia ki MLA jong ka party ha ka sngi ba ka party ka la sdang ia ka jingiakhih ha ka 19 tarik, Kyllalyngkot, 2024 katba ki dang tur ban pynlong ia ka jingiakhih da kaba shong kyllain mynngor hakhmat ka ophis Secretariat ban pyrshah ia ka jingwengkam ia ki lai ngut ki ophisar na ka Meghalaya Lok Ayukta.
Kane ka jingkren jong une u nongialam ka VPP ka long hadien ba ki lad pathai khubor ki la pyni ha ka taiew baladep ia ka jingpatan jong ki Pulit ia u MLA ka Mawlai Constituency u Bah Brighstarwell Marbaniang katba u dang ialam ia ki nongbud ban tur sha Secretariat ban shong kyllaiñ myngngor kum ka jingpyrshah ia ka jingmynthi ka Sorkar Jylla halor ka jingdawa ban thungkam biang ia ki lai ngut ki Ophisar ba la shah weng na ka Meghalaya Lok Ayukta.
Haba kren sha ki nongkyrshan hadien ka jingiakynduh ia ka Myntri ka tnad aiñ ka Dr. Ampareen Lyngdoh, u Bah Ardent u la pynpaw ba ka party kam don kano kano ka daw bad ki Pulit hynrei ka jingialeh kan long bad ki Myntri kiba bat ia ka bor.
“Kane ka jingiakhih jong ngi, ka dei ka hok kaba ngi iakhih ha ka ri synshar paidbah,” ong u Bah Ardent.
“Ngi la rah ruh ia kane ka mat, ia ka jingpyndonkam jong ka tnat Pulit ia ki Pulit tap khmat, ki Pulit ki bym don wat tang ka kyrteng (name plate). Lada ka dei ka mask Covid te ngin ia shah hynrei ka dei ka kaba la tap lup beit ban iohi tang ia ka dur khmat. Kata ka dei kaba ngi la iakren hynne (bad ka Myntri Sorkar). Ngi la kren ruh ia ka jingktah kti jong ki Pulit ia ki MLA ha ka sngi kaba nyngkong. Ia kane ngim pat sangeh. Ngi kwah ban iathuh ha phi, ba ka Assembly ka don ia ka Privilege Committee, kaba ki MLA jong ngi kin sa shimti ia kaba ki dei ban shim. Ngim don eiei pyrshah ia ki (Pulit) hynrei ki (Pulit) dei ban sngewthuh ba ma ngi kum ki nongialam kiba u paidbah da ki phew hajar u la jied ba ngin rah ia ki jingeh jong u paidbah ha Assembly ym dei ban ailad iano iano ban shu kheiñ dewthala ia kata,” u la ong.
“Ngi la rah ia kane ka mat, da kaba sngewkhia mynne bad na ka liang jong ka Myntri ka tnat Ain, ka la kren ia u Ophisar hakhmat jong ngi ba kin shimkhia ia kane ka mat kaba ngi la rah. Ngin sa rah ruh ia kane ka mat ha ka jingiakynduh markhmat bad u Myntri Rangbah. Ngim don eiei kaba pyrshah ia ki Pulit. Hynrei ki Pulit kim dei ban kah ia ka durkhmat haba ki hap ban iatakhuh bad ki nongmihkhmat paidbah ne bad ki paidbah khamtam eh haba ngi iakhih katkum ki hok synshar paidbah. Ngim dei ki nongpynkulmar shnong, ngi dei ki nongshong shnong kiba bat ia ka aiñ, ngi tip ia ka ain,” la bynrap u Bah Ardent.
Haba kynthoh ia ki bor synshar District u Bah Ardent u la ong, “ha ka jingshisha dei ki bor synshar district kiba pynkhein ia ka ain. Ki bor synshar district shwa ba kin pynjari ia ka Section 144 ka dei ban da sngewthuh shai ba ka jingthmu jong ngi ka long kaba sniew bad kaba pynmih jingkulmar.”
