Shillong, Rymphang, 02: Ki bor bahalor jong ka Bharatiya Janata Party (BJP) na New Delhi haduh mynta kim pat phah ktien eiei ruh em haduh kine ki sngi sha ka BJP Meghalaya Pradesh ban pan ïa ka kyrteng jong ki kyrtong kiba pan tiket ban ïakhun na Shillong bad Tura Seat ïa ka elekshon Lok Sabha ka ban sa long shen mynta u snem.
U MLA ka BJP Bah Alexander L. Hek uba long ruh u nongïalam ka party ha ka jingïakren bad ki lad pathai khubor ha ka sngi Saitjaiñ u la ong, “ngi khmihlynti ba ka elekshon kan kan long ha u bnai Ïaiong hynrei mynta la poi sha u Rymphang lehse hapoh une u bnai ngi khmihlynti (ba ka BJP na Delhi kan pan ïa ka kyrteng jong ki kyrtong).”
Haba kylli, u la ong, “haduh mynta ki nongïalam bahalor ka party kim pat pan satia ïa ka kyrteng jong ki kyrtong haduh mynta watla ki la don katto katne kiba la pan tiket hynrei haduh mynta ngim pat lah satia ban phah sha Delhi namarba ki nongïalam haduh mynta kim pat pan satia.”
Halor ka jingkylli, hato ka BJP kan ïatreilang neem bad ka NPP ha elekshon Lok Sabha, u Bah Hek u la ong, “ngam ïohi ïa kano kano ka daw balei (ba ka BJP) kan ïatreilang (bad ka NPP).”
