Shillong, 11 Naitung : Ha kane ka juk jong ka teknoloji kaba mynta, ki rynsan Social Media kum ka Youtube, ka Instagram, ka Facebook, ka X bad kiwei pat ki rynsan Social Media ki la plie lad shisha ia kiba bun ki samla bad ki hep kiba rit ba kin ioh pynpaw ia ka sap ka phong jong ki bad ym tang katta hynrei ka dei ruh kawei na ki lad kamai kaba ki lah ban kamai pisa katkum ka jinglah jong ki ban khring ia ki paidbah kiba peit.
Na kane ka jylla jong ngi, ki la mih bun ki samla kiba la pyrshang katba don la ka buit ka sap ban khring ia ki paidbah lyngba ka jinglah jong ki ban pyni ia kata ka sap jong ki la ka long ha ka rwai ka siaw, ka put ka tem, ka ialeh biria bad kumta ter ter. Hynrei kim shym la poi pyrkhat pat ba ka sorkar kan phai khmat sha ki bad ban ithuh ia kata ka sap kaba ki don.
Dei ha ka 11 tarik u Naitung , 2024 ba ka sorkar ka la pyni ia ka dak ka jingithuh ia kata ka sap kaba ki samla jong ngi ki don, da kaba ka pyllait paidbah ia ka Hello Meghalaya Content Creators Award 2024 lyngba ka jingiatreilang hapdeng ka Meghalaya Grassroot Music Project bad ka Hard Rock Café.
U Myntri Rangbah ka jylla u Conrad K Sangma, u Myntri ka tnat jngohkai pyrthei u bah Paul Lyngdoh ha ryngkat ka jingdonlang u Chief Secretary u bah Donald P Wahlang ki la pyllait ia ka jingsdang ia ka Hello Meghalaya ha ka jingialang kaba la long ha Lariti Performance Centre kaba don ha Mawkasiang.
Ha kane ka sngi la ai khusnam ia ki Content Creators lane kita ki riew donsap kiba lah ban sei ia ka sap jong ki lyngba ka jingring dur bad ia ka khusnam la phiah ha la ki jong ki jong ki bynta da kaba pynshong Nongrim ia ka jingmut jong ka Video kaba ki la pynwandur.
Ia ka khusnam Best Social Change Influencer lane ka khusnam kaba wanrah ia ka khubor jong ka jingkylla ha ka imlang sahlang la ioh rah da u Jr. Storyteller Lyndon. Ia ka khusnam Best Green Influencer lane ka khusnam kaba ia dei bad ka jingpynneh pynsah ia ka mariang la ioh rah da ka Green Tech Foundation, ia ka khusnam Emerging Influencer of the Year la ioh rah da ka Warimeki Lyngwa, ia ka khusnam Best Food Influencer kaab pyni shaphang ka bam lane ka rukom shet rukom tiew la ioh rah da ka Triyan Babilsi.
Nangta ia ka Best Traveller Influencer ne ka khusnam na ka bynta kito kiba shang kylleng ki jaka ban pyni ia ka jingitynnad ka jylla la ioh rah da ka Grace Marbaniang bad u Akkim Tito A Momin. Ia ka khusnam Best Lifestyle Influencer lane kiba pyni shaphang ka riam ka beit la ioh rah da ka Pema Leilani Ward Kyndiah. Ia ka Best Comedy Influencer lane kiba leh ia ki kam biria la ioh rah da ka kynhun jong ka Chi-iung.
Na ka bynta ka Fashion Influencer pat la ioh rah da u Dr.Kham Chyrmang, khusnam Best Makeup Influencer la ioh rah da ka Rachel Anne Nongkhlaw, Best Music Influencer la ioh rah da u Wanjop Sohkhlet, Best Viral Influencer lane ka khusnam na ka bynta kito ki Video kiba sted bha ban saphriang paidbah la ioh rah da ka kynhun jong ka Biria Shillong.
Infotainment Influencer la ioh rah da u Yowanmi Myria na ka Channel Technology Khasi. Na ka bynta ka Best Health and Wellbeing Influencer lane ka khusnam na ka bynta kito kiba pynphriang ia ka khubor shaphang ka koit ka khiah lyngba ka jingkilan met la ioh rah da ka Dapalei Stacy Warjri katab ia ka khusnam Best Podcaster pat la ioh rah da u Ferdinand Rani ia uba la ju tip kum u Code Freeman. Baroh ki nongioh khusnam ki ioh rah ruh ia ka song pisa kaba mar 25 hajar tyngka.
