Shillong Jylliew 23 : Ka Kong Phidalia Toi ka la pyntip ba kan sa iehnoh ia ka kam Chairperson jong ka Meghalaya State Commission for Women (MSCW) hadien ba ka la mih ka jingiashrut bad u Myntri ka tnat Social Welfare ka Sorkar Jylla u Bah Paul Lyngdoh.
Ha ka jingiakren bad ka Batesi Tv ha ka sngi thohdieng ka Kong Phidalia Toi, ka la iathuh ba ka la ioh jingtip halor ka jingshah weng jong ka na ka shuki Chairperson jong ka Meghalaya State Commission for Women (MSCW) tang na ki lad pathai khubor bad hadien ar tylli ki kyrwoh khubor ba la phah sha ki lad pathai khubor, ka Sorkar ka la pan jingpynshai na ka lyngba ka Show Cause Notice.
Ka la ong, tang hadien ba ka la phah ia ka jingpynshai sha ka Sorkar, hadien katto katne por kan sa iehnoh ia kane ka shuki da kaba iasyllok shwa bad ka nongsaid-aiñ jong ka.
“Hadien ba ka Commission ka la phah ia ka jingpynshai, u (Bah Paul Lyngdoh) u dang iai leh kuman da kaba kren sha ki lad pathai khubor ia ka bymshisha.
“Ngam kwah shuh ban iatrei lang ha kum kane ka kynrum kynram namarba kane ka jingiashrut kan wanrah tang ia ka jingbymsngewtynnat bad nga ngeit ba kan jin da la bha ba ngan mih noh na ka bynta ka jingbha jong ka Commission bad ka bha ka miat jong ki kynthei. Ngan hap ban resaiñ bad ngan hap ban shim ia ka rai kumno ban leh ynda nga la iasyllok shwa bad ki Muktiar jong nga,” la ong ka Kong Phidalia Toi.
Haba kynnoh ba u Bah Paul Lyngdoh u la pyndonkam bakla ia ka itkiar kum u Myntri Sorkar, ka Kong Phidalia Toi ka la ong, “peit kaei kaba u Myntri u la leh nga tharai ba ka dei jingpyndonkam bakla ia ka iktiar bad nga shim ia kane kum ka jingpyniapher, ka jingñiew shiliang bad ngan sa peit kaei kaba ngan sa leh hadien kane.”
