Jowai, Rymphang 23: U District Magistrate ka ka West Jaiñtia Hills u la pynjari da ka Section 144 CrPC hadien ka jingïoh jingujor ba ki nongshong shnong ka Umshangiar, Raij Tamu, Elaka Nongjngi, kim shym la bud ïa ka hukum ba la pynmih da u Executive Magistrate jong ka West Jaiñtia Hills District u W.K. Kharbuli katkum ka jingujor Case No. 11/2023 U/S 107/145 CrPC bad katkum ka jingïoh kaiphod na ka Saitsama Out Post jong ka West Jaiñtia Hills ba ki nongshong shnong jong ka shnong ka Umshangiar ki dang bteng ban leit pom ïa ki dieng ki siej wat hadien ba la don ka jingujor mukotduma halor ka jingïaknieh jaka hapdeng ka shnong Lumlakhiat bad ka shnong Umshangiar.
Katkum ka kaphod na ki Pulit la pyntip ka la don ka jingpynkheiñ ïa ki kyndon aiñ ba ladep pynbna khamtam ha kine ki ar tylli ki shnong ba don hapdeng ka jingïakajia pud kata ha “LumKhohskhen”, “LumMynsiang” bad ha “Um Saitshyieng” jong ka Raij Tamu, Elaka Nongjngi West Jaiñtia Hills District.
Khnang ban wanrah ïa ka jingshongsuk shongshngaiñ bad ban lait na ki jingjia ba sngewsih ha kine ki shnong, u District Magistrate, ka West Jaiñtia Hills Bah B.S. Sohliya u la pynjari da ka Section 144 CrPC ba la mana pyrshah ban ïalum paidbah shi jaka palat ïa ka san ngut shaneng.
La khang ban rah ïa ki tiar pynmynsaw bad kane ka hukum kam shym la khang ïa ki Pulit kiba don ha ka kamram.
La khang ban pom ïa ki dieng ki siej, ka jingleit pynkhuid ïa ki jaka ki puta lane kino kino ki kam kiba pynkheiñ ïa ka kyndon aiñ.
La khang ban rah ïa ki kurat bad ki wait kiba pyndonkam ban pom ïa ki dieng ki siej ha ki bynta ba ïakajia.
La khang ban ïaid ki kali ha kitei ki bynta da ka jingthmu ban leit kit ïa ki dieng ki siej lait tang ki kali Pulit ki ban pyndep ïa ka kamram.
Kane ka hukum kan treikam mardor ha kitei ki bynta ba ïakajia pud kynthup ha ka shnong LumKhohskhen”, “LumMynsiang”, bad ha “Um Saitshyieng”, kiba dang hap hapoh ka Raij Tamu, Elaka Nongjngi West Jaiñtia Hills District.
Kino kino kiba pynkheiñ ïa kine ki jingmana ki lah ban shah pynshitom katkum ka kyndon jong ka Section 188 jong ka Indian Penal Code (IPC).
Kane ka hukum kan treikam mardor tad haduh ban da pynbna da kumwei pat.
