Shillong, Rymphang 03: Ka BJP Meghalaya Pradesh ha ka sngi u Blei ka la pynkha ïa ka BJP Shillong City District hapoh ka jingïalam jong u Bah Mariahom Kharkhang.
U State President ka BJP u Rikman G. Momin u la buh ruh ïa ka thong ba ka kynhun ba la ïalam da u Bah Kharkrang bad u State Secretary bad nongsaiñdur ïa ka South Shillong u Bipen Pradhan ban peit ïa ka Shillong City na ka bynta ban kyntiew ïa ka jingïoh vote haduh 1 lak ha Shillong City ha ka elekshon Lok Sabha ka ban sa long shen.
Ïa ki nongïalam jong kane ka kynhun la pynskhem da u Rikman Momin.
Ki nongïalam ka party kiba la ïashim bynta ha ka jingïalang ki la ïathir ïatai ruh ïa ka jingthmu kumno ban pyntreikam nangne shakhmat.
“U President ka Shillong City bad u nongpeit ïa ka Shillong City bad kiwei kiwei ki nongïalam ba hakhmat ka party kin sa leit rung sha baroh ki Constituency kiba don haph ka sor Shillong naduh ka taiew banyngkong mynta u bnai,” la ong u Presient ka Shillong City Bah M. Kharkrang.
U Bah Kharkrang u la ong, “namarba ki nongthep vote ha Shillong ki dei kiba la tip kham bha ïa ki kam pynroi kiba wan na Delhi ki paidbah kin sa phaikhmat sha ka BJP ban jied ha ka elekshon Lok Sabha ban ïa kaba pynlehnoh ei ïa ka vote bakordor sha kiwei pat ki party. Kumba ki dak ki shin ki pynpaw, ka pawshai hi ruh mano ban ïoh thaw biang ïa ka Sorkar ha Delhi. Lada u MP na ka jylla Meghalaya un dei na ka BJP kan pynsuk ïa ngi ban ïakren ïa kino kino ki mat jingdawa jong ka jylla bad kynthup ruh ïa ki pynsngew jong ki nongïalam Niam.”
“Kan don jingmut aiu ban ai ïa ka vote sha u kyrtong MP bym dei na ka BJP ha kaba wat tang ïa ka sur jong u ruh yn ym ïohsngew satia ha Delhi,” la ong u Bah Kharkrang.
U la ong ba un sa pynthikna ba baroh ki nongtrei na ki shnat treikam bapher bapher ka party kin sa leit rung sha manla ki thliew ing ban pynthikna ba ki paidbah kin ai ïa ka vote ïa u kyrtong ka BJP ha kane ka kynti.
