Shillong, Lber, 10: Ka tnat Pulit ha ka sngi u Blei ka la pynbna ban ai khusnam shi lak tyngka ia kino kino ki briew kiba lah ban ai ia ka jingtip kaba bniah kaba lah ban ioh ksai na ka bynta ban iohkem ia kino kino ki briew kiba donkti ban pynbthei ia u bom IED ha Them Iewmawlong ha ka miet sngi Saitjaiñ.
“Ka tnat Pulit jong ka East Khasi Hills ka la pynbna ban ai khusnam T. 1,00,000 lak sha kino kino kiba lah ban ai ia ka jingtip kaba bniah kaba lah ban iohksai na ka bynta ban ioh kem ia kino kino ki briew kiba donkti ha kane ka kam pyntriem bad ka kam runar. Ia ka kyrteng jong ki nongai jingtip yn sa buhrieh kyrpang. Ia ka jingtip lah ban phah sha ka Special Cell lyngba ka Call/Text/WhatsApp ha u mobile number 9366790273 lane lyngba ka email: specialcelLekh.m1p(i)comail.com,” la ong u Superintendent of Police ka East Khasi Hills u Rijuraj Ravi ha u kyrwoh ba la phah sha ki lad pathai khubor.
Ha ka sngi Saitjaiñ ha ka por kumba 10:30 baje mynmiet, u bom Improvised Explosive Device (I ED) u la bthei ha kawei ka ing tap tin bym don shuh ba shong basah kaba don ha Syndicate Bus Stand, Punjabi Lane, Them Iewmwlong.
U SP u la pyntip ba ia u bom IED la buh hapoh ka tin. Ka jingbthei, ia kaba la suba ba la pyndonkam da ki Gelatin Stick, la buh hapoh ka ing tap shiliang, kaba la pynjulor ia ki iit jong ki jingkhang iit jong ki ing kiba don markhap bad kane ka ing ba la jia ka jingbthei.
Uwei u nongiaid lynti uba la ithuh kyrteng kum u Lakhan Singh u la mynsaw malu mala na ki bynta jong ka kjat namarba ka jingsied jong ki phngit ba la mih na ka jingbthei.
“Ka kynhun kaba donkti ha kane ka kam runar ka dei kaba syriem kum ka jingbthei kaba la jia ha ki snem baladep ha kaba ka seng kieng atiar ba la kheiñ beaiñ ka HNLC ka la shim ia ka jingkitkhlieh. Hynrei, tad haduh ha kane ka kynti ba la pynmih ia kane ka khubor, ym shym la don satia kano kano ka kynhun ne ka seng kieng atiar ka ban shim ia ka jingkitkhlieh halor kane ka jingbthei,” la ong u SP.
Ha kaba iadei bad kane, ki Pulit ki la ujor da ka ejahar ba la rejistar Sadar Police Station na ka bynta ban pynlong shuh shuh ia ka jingtohkit hapoh ka Unlawful Activities (Prevention) Act bad ka Explosive Substances Act.
“Ki Pulit jong ka East Khasi Hills ki la kut jingmut ban tohkit bniah bin pa bin ban iohkem ia kiba donkti bad ban tian bishar ia ki hakhmat ka aiñ,” ong shuh shuh u SP bad bynrap, “na ka bynta kane, ngi pan ka jingiatreilang na ki paidbah ioh ia ka jingjop.”
