Nongstoiñ, Lber, 10: Ka long ka jingmyntoi bad ka jingkyrkhu ïa ki khynnah ka FGEM Higher Secondary School Nongspung ha kaba ka ophis u Commandan 4th BN, MLP, Sohpian ha ka taiew baladep ki ai jingpynshai ha kaba ïadei kumno ban kiar na u drok bad ban pynsngewthuh ha kaba ïadei bad ki kam Pulit ba lait ha ka tnat Pulit
Ha kane ka prokram kaba la long hapoh ka skul la pynïaid ïa ka jingïalang da u Principal Bah Kyrshan Marngar ryngkat ka jingïadonlang ki nonghikai bad ki khynnah skul. U Principal u la pdiang sngewbha ïa u Commandant uba la kloi ban ai jingpynsngewthuh sha ki khynnah skul.
U Principal u la pynpaw ruh ka jingsngewnguh ïa u Bah Syiem ba u la wanrah ka jingïadei kaba jan hapdeng ki paidbah lyngba ka Civic Action Programme bad kiwei pat ki prokram bapher bapher khamtam ban ai jingïarap ïa ki paid nongshong shnong kane ka thain khamtam ki baduk kiba don hajan kane ka ktem jong ka 4th MLP Bn, Sohpian.
U Bah Lakador Syiem u la pynshai bniah shaphang jingsniew bad ka jingshyrkhei u drok lyngba ka Presentation halor ka Phang “Ill Effect of Drugs on Youths and Society” bad batai bniah shaphang ki lai jait ki drug, u Natural Drug, Semi Synthetic Drug bad u Synthetic Drug.
“To ngin ïa ong em ïa u drug, to ngin kiar na ki kam sniew ban leh ïa ki kam babha namar nyngkong u pynsngewbang hynrei hadien u wanrah tang ïa ki jingbabe suba,” la ong u Bah Syiem.
“Nga ruh nga dei u khynnah skul kum ma phi mynshwa nga long kumne dei na ki nonghikai, ki kmie ki kpa kiba la hikai ïa nga”la pynshlur u Bah Syiem ïa ki khynnah skul kiba la biang ka rta ban aplai ïa ka kam Pulit namar ha kane ka juk kyrduh kam Sorkar dei satang ha ka tnad Pulit ba bun ki nongkyndong ki dang ïoh kam Sorkar kaba dang lah ban ai kam da ki hajar ngut.
