Shillong, Rymphang, 21: Ki shipai BSF ha ki jingleit khynra ha kiba bun ki jaka, kaba la pynlong ha ka 20 tarik mynta u bnai, 2024, ki shipai ba la peitngor bha ki la lah ban pynpulom ïa ki jingpyrshang ban khaïi beaiñ ha u pud u sam jong ka India bad Bangladesh ha kaba ki la ïoh ban kurup ïa ka dawai Phensedyl bad ka shini kaba la mut ban khaïi beaiñ sha Bangladesh.
Hadien ka jingïoh jingtip kaba thikna ki shipai ba la pahara bha jong ka kynhun 172 Bn BSF Meghalaya ki la ïoh ban kurup haduh 200 bitor ka dawai jyrhoh ka Phensedyl katba dang thmu ban khaïi beaiñ sha Bangladesh lyngba u pud u sam ka ri na East Jaiñtia Hills Meghalaya.
Ha kawei pat ka jingleit khynra ba la pynlong da ki shipai BSF Meghalaya, kumba 3 ngut ki nong India ki la shah bat ha ki BSF bad la kurup ruh na ki ïa ka shini kumba 6,800 Kilo na ki thaiñ khappud bapher bapher jong ka Meghalaya. Ïa kitei ki dawai bad shini ba la kurup la aiti sha ka ophis Custom bad ka thanat pulit ban leh ïa ki kam katkum ka aiñ.
