Shillong, Jylliew, 30: Ka jingther jong u lapbah bad ka jingbeh kyrthep jong ka eriong ha kine ki sngi ba la leit noh ka la wanrah ia ka jingiap ei jong ki mynsiem briew bad da ki hajar ngut ki paidbah ki la shah ktah.
Ia kane la iathuh da ka Executive Director jong ka State Disaster Management Authority ka Kong Matsiewdor War Nongbri haba ai jingkhein halor ka jingshah ktah jong ki 199 tylli ki shnong na ka jingther jong u lapbah lapsan ha kylleng ka jylla Meghalaya baroh kawei.
Kane ka jingioh jingkheiñ thymmai halor kine ki jingjia ha kylleng ka jylla ka long hadien ba ka tnat Disaster Management ka la shong ia ka jingialang pyrkhat kam lane ka Review Meetiing ha ka 30 tarik u Jylliew, 2023 ba la pyniaid da u Myntri ka Sorkar Jylla u Bah Kyrmen Shylla.
Ka Kong Matsiewdor ka la iathuh ruh ba ha kine ki jingjia, haduh 13, 682 hajar ngut ki briew ki la shah ktah na ki jingshlei um, ki jingtwa khyndew. Naduh ka 1 tarik haduh ka 30 tarik u Jylliew, 2023, la ioh jingkhein ba ki don haduh 27 tylli ki jingri jingdub kiba la iap ha kine ki jingwan lynshop jong ki bor ka mariang.
Ka la iathuh ruh ba haduh mynta arngut ki briew ki dang jah rngai, 7 ngut kiba mynsaw bad 27 ngut ki mrad kiba la iap.
138 tylli ki ing ki sem kiba la shah pynjulor, 182 tylli kiba la julor malu mala, 31 tylli kiba dang don hapdeng ka jingtohkit bad 30 tylli ki jingtei ki la shah pynjulor.
Ha kine sngi, ki district kiba la mad ha ka jingwan lynshop jong ki bor ka mariang ki long ka North Garo Hills, ka West Khasi Hills, ka East Khasi Hills, ka South West Khasi Hills, ka East Jaintia Hills, ka West Garo Hills, ka South West Garo Hills bad ka Ri Bhoi District.
U Myntri ka tnat Disaster Management u Bah Kyrmen Shylla u la iathuh ba ka Sorkar lyngba ka tnat Disaster Manangement ka la siew ia ka bailutksan kum shi bynta ban iarap ia ki longing kiba mad ia ki jingjia ba sngewsih khamtam ia kito ki longing kiba la jia ka jingshah pom pyrthat ha kine ki sngi ba la leit noh.
U la iathuh ba ka jingsiew bailutksan ka long ruh wat sha ki mrad kiba la iap na ka jingshah pom pyrthat.
U la ong ruh ba ka sorkar ka la shim rai ban pynher da ki Drone ban tohkit ia ki jaka kiba shah ktah na ka jingshlei um ha ki bynta bapher bapher jong ka jylla khnang ban ioh ai jingiarap kyrkieh ia ki paidbah ha ka por ba donkam.
