Shillong, Nailur, 12: Ka Akhil Bharatiya Vidyarthi Parishad (ABVP) Shillong ha ka sngi Palei ka la sam ïa ka khusnam U Tirot Sing Best Students Awards 2024, sha ki khynnah skul ïa ki samla pule kiba wan shakhmat ha ki jingpule na ki skul bad ki kolej bapher bapher ha ka jingïalang pynkup burom kaba la long ha U Soso Tham Auditorium, Shillong.
La pynkup burom ïa ki khynnah pule kiba pas bha da u Myntri Khynnah ka Sorkar Pdeng uba khmih ïa ka tnat External Affairs and Textiles u Pabitra Margherita ryngkat ka jingsakhi lang jong u Dr. Kestonbel Manik Syiemlieh uba dei na ka iing ka sem jong u Syiem Tirot Sing Syiemlieh, u Dr. Sashankutlang Khongthohrem uba long u State President jong ka ABVP Meghalaya, u President barim ka BJP Meghalaya u Bah Ernest Mawrie, u MDC ka BJP u Bernard Marak bad kiwei kiwei.
U Pabitra Margherita haba kren ha kane ka sngi u la pynpaw ïa ka jingsngewkmen ban ïoh ïa kane ka lad ban ïa don bynta lang bad ka AVBP ha ka jingpynkup burom ïa ki samla pule kiba la pas bha.
U ong ba kane ka jingpynkup burom ïa ki samla pule kiba pas bha kan nang ai mynsiem shuh shuh ïa ki ban trei shitom bad kaba kham kyrpang ka long ba ka Ri India lyngba u Myntri Rangbah ka Ri u Narender Modi u la wanrah ïa ka nam bad ka burom jong ka jylla Meghalaya bad kiwei ki jylla da kaba ithuh ïa ki Khlawait na ka jylla.
Kumba ka long mynta ka ri India baroh kawei ka tip ïa u Syiem Tirot Sing uba mynshuwa ym don kiba ithuh kyrpang ïa une u riewkhraw uba ieng ban ïaleh pyrshah ïa ka bor ba khlaiñ jong ka Sorkar Bilat.
U la ïaroh ruh ïa ka jylla Meghalaya bad ïa ki jingitynnad jong ka mariang lyngba ki jaka jngohkai pyrthei bad pynpaw ba bun ki briew mynta ki tip bad thrang dikdik ban wan jngohkai ïa ka jylla Meghalaya bad kane kan kyntiew ïa ka roi ka par bad ka ïoh ka kot ha ka jylla bad ha ka thaiñ hi baroh kawei.
